“Aprova projetu deliberasaun, ne’ebé aprezenta husi Ministériu Planu no Ordenamentu, ba aprovasaun prosedimentu aprovizionamentu hanesan konkursu públiku internasionál, ba adjudikasaun ba kontratu públiku atu sosa no halo instalasaun ligasaun dijitál ida iha Timor-Leste, liuhusi kabu submarin (MPO) u fibra ótika, ba sidade Darwin no Port Hedland, iha Commonwealth Austrália”, informa Ministru Finansas, Rui Augusto Gomes, hanesan mós Ministru Prezidénsia Konsellu Ministru Interinu, liuhusi Komunikadu ne’ebé www.tempotimor.com, asesu kuarta (13/04).

Aliende ne’e, Konsellu Ministru delibera atu autoriza prosedimentu aprovizionamentu, ba konkursu públiku internasionál, ba adjudikasaun kontratu ezekusaun obra konstrusaun Unidade Pediatria no kuidadu koronáriu intensivu iha Hospitál Nasionál Guido Valadares (HNGV). 

Projetu ne’e aprezenta husi Ministra Saúde, Odete Maria Freitas Belo, hodi konstrusaun unidade foun ida-ne’e ho objetivu prinsipál atu hadi’a asesu no kualidade kuidadu espesializadu ne’ebé presta iha HNGV, liliu internamentu ba kazu emerjénsia no urjensia pediátrika.

“Sei mós hadi’a ho di’ak liután resposta nasionál ba surtu esporádiku no emerjente dengue, kolera ka surtu seluk ho impaktu boot ba saúde públika, liuliu ba bebé foin moris, labarik no adolesente sira”, dehan nia. (*)