Tanba AIFAESA hanesan Institutu Púbiku, ne'ebé ho kompeténsia hodi halo kontrolu ba atividade ekonómika, sanitária no alimentár iha ámbitu inspesaun no fiskaizasaun hola parte iha ekipa traballu ne'ebé organiza liuhusi Sekretáriadu ba preparasaun distribuisaun Sesta Bázika etapa daruak.

Tuir informasaun ne’ebé www.tempotimor.conm asesu iha pájina ofisiál AIFAESA, kuarta (13/04) katak, Xefé Gabinete Inspetór Jerál AIFAESA, Filipe Gomes, hamutuk ho Diretór Departamentu Operasaun, Viriato Paulo no Diretór Departamentu Metrolojia no Padronizasaun, Julito Barreto, AIFAESA partisipa iha reuniaun ekipa Sekretáriadu hodi tau hanoin hamutuk ba preparasaun distribuisaun sesta bázika, etapa daruak nian.

Reuniaun ne’e lidera husi Koordenadora ba sekretáriadu Sesta Bázika, Florentina Smith no marka prezensa husi entidade implementadór sira hanesan Ministériu Turízmu, Komérsiu no Indústria, Sekretáriu Estadu Kooperativa, Asesores Ministériu Koordenadór Asuntu Ekonomia (MAKE) hodi halo diskusaun ba planu Atividade, kalendáriu Implementsaun inklui lansamentu distribuisaun sesta bázika ne'e rasik.

Iha sorumutu ne'e, Kordenadora Florentina Smith, introduz importante tebes AIFAESA prezensa iha ekipa refere tanba bele akompaña prosesu no fó nia paraser tékniku kona-ba ezekusaun distribuisaun sesta bázika tuir nia papél ne’ebé iha liliu ba kualidade no kuantidade husi produtu sira iha Sesta bazíka ne'e sei distribui ba benifisiáriu sira. (*)