"Problema bele iha, husu ita hotu nia espiritu boa vontade, hanoin ho kakutak malirin, sé ho emosaun horsida ita fó presaun ba malu, ita fó solusaun para sira (kundotór) iha benefísiu sira kontente parte hot-hotu kontente, ita labele foti dezisaun ida kontente barak liu la kontente," dehan nia iha Aeroportu Baukau, kinta (07/04).
Transporte públiku Bus diresaun husi Dili ba Munísipiu Baukau, Vikeke inklui Lautém mak dadaun la halo movimentu.
Tanba ne'e, iha loron 06 fulan-marsu tinan-2022 (horseik) nia parte kontaktu ho Prezidente Autoridade Munísipiu Vikeke husu folin kombustivél sa'e, husu ema hotu nia koperasaun labele aumenta problema.
"Ita labele lori situasaun grave ona ita fó presaun ba malu, ne'e la duun diak, rai ne'e pertense ba ita hotu, ita mós labele hola desizaun ruma afeita fali ba ita nia populasaun sira sai vítima," nia hatete
Antes ne'e, kundotorés sira ezije atu hasa'e tarera pasajeiru husi Dili ba Munísipiu Baukau selu US$5, maibé hatan ba kestaun ne'e, Ministru Transporte no Komunikasaun, José Agustinho da Silva, hatete, la'os kompetensia Minisitéiru ida nian hodi foti desizaun, maibé tenke liuhusi desizaun kolektiva.
"Ejizensia sira ne'ebé mak iha, ne'e la'os kabe ba kompetensia parte ida nian para hola desizaun, ne'e tenke iha desizaun kolektiva ida, iha mós membru Governu seluk hanesan MTCI depois Minisitéiru sira seluk, para haree asuntu ne'e, sé iha solusaun setór transporte terestre nian, tenke iha solusaun mós parte seluk, tanba ida konsumu barak liu ne'e mak ita nia populasaun, sé ita hola dezisaun, valoriza balun mais, balun sai vítima, entaun nia reasaun orsida iha fali reasaun sosiál," nia hakotu (*)