“Apesar de Governu trata jornalista sira hanesan ema ne´ebé mak laiha skill (kapasidade) ona maibé kontinua dada prosesu pagamentu ne´e to´o bainhira, TLPU hakarak husu esklaresimentu hosi Ministériu Finansa, nune´e bele responde preokupasaun jornalista sira-nian”, deklara Prezidente TLPU, Candido Alves, iha Jardin 5 de Maui, kuarta (06/04).

Tanba TLPU nu´udar organizasaun ida ne´ebé fó mahon ba jornalista timoroan tomak ho atu promove no defende direitu jornalista sira-nian bainhira hala´o kna´ar professionál iha órgaun komunikasaun sosiál.

TLPU la’ós organizasaun polítika ida ka la’ós organizasaun komérsiu (naun-profit), maibé hanesan mós asosiasaun kontrolu sosiál liuhusi atividade jornalístika ho prinsípiu krítiku ne´ebé konstrutivu.

“Siknifika Organizasaun ne’e atu dezenvolve kapasidade, kria métodu kontrola sosiál ida di’ak no akuntável hodi partisipa iha prosesu demokrasia no dezenvolvementu ho prinsípiu ida katak fó hanoin no fó hatene liuhusi krítika ida ne’ebé konstrutiva ho intensaun atu hadi’a hodi servi di’ak liután ba povu no nasaun”, dehan nia.

Bazea ba prinsípiu ne´ebé iha, TLPU haree katak direitu frontline jornalista sira-nian to´o agora Governu seidauk responde maske Prezidente Repúblika promulga ona dekretu lei númeru 1/2022, 5 janeiru kona-ba kriasaun subsídiu ba professionál sira ne´ebé dezenvolve atividade jornalístika.

Profesionál komunikasaun sosiál sira dezenvolve sira-nia atividade jornalístika durante Estadu Emerjénsia ho forma ezemplar, kontribui ativamente ba divulgasaun informasaun kredivél no nesesária kona-ba prevensaun no kombate pandemia iha teritóriu nasionál, ne´ebé mak hamenus ansiedade populasaun sira-nian no prevensaun ba pániku iha sosiedade, halao sira-nia dever ho profissionál no kontribui ba ema hotu nia di´ak.

Ho informasaun sira ne´ebé divulga husi profesionál sira ne´ebé ezerse atividade jornalístika kontribui ona oinsá mak populasaun kumpre regra Estadu Emerénsia nian no halo tuir protokolu saúde hodi minimiza no prevene propagasaun husi vírus.

Papél ne´ebé hala´o husi jornalista sira mak Governu rekoñese ba risku ne´ebé profesionál sira hasoru, ba dedikasaun no esforsu ne´ebé sira hatudu liuhusi hala´o sira-nia tarefa durante períodu difísil iha nasaun.

Maibé hafoin TLPU akompaña prosesu tomak, parte sira balun hanesan (Saúde, Autoriedade Seguransa no seluk tan) ne´ebé konsidera frontline hetan ona sira-nia direitu maibé to´o agora direitu jornalista sira-nian Governu seidauk fó reposta.

“TLPU husu ba Governu atu konsidera jornalista sira nu´udar frontline hanesan mós ekipa frontline sira seluk ne´ebé hetan ona suplementu remuneratóriu. TLPU husu ba Ministériu Finansa atu bele pronúnsia buat ruma ba públiku liuliu jornalista sira nia direitu ne´ebé previstu ona iha dekretu lei, katak tanba saida mak prosesu ne´e paradu iha Ministériu Finansa, karik dokumentu ruma mak seidauk kompletu ka iha erru tékniku ruma ne´ebé akontese karik bele komunika filafali ba MAPKOMS atu bele hatutan ba média sira hodi priénse rekezitu ho loloos”, hatete Zezito. (*)