“SEFOPE liuhusi Diresaun Nasionál Empregu Exterior (DNEE) realiza seremónia asina deklarasaun ho família traballadór na’in-58, iha loron tersa (05/04) atu husik oan, la’en ba servisu ba nasaun Kóre Súl. Traballadór sira ne'e sei aranka ba Kóre Súl iha kloron kinta (07/04)”, informa Diretór DNEE, Filomeno Soares, iha Ótel Timor Logde, tersa (05/04).

Ho serimónia ne’ebé halo atu oinsá parte husi Governu no família assina deklarasaun atu sai hanesan kompromisiu ida katak inan aman no família prontu ona husik sira-nia oan, la’en husi sira-nia le'et ba servisu iha ema nia rain.

Tanba ne’e, la'ós Governu mak obriga timoroan atu ba servisu, maibé Governu kria kondisaun de'it, oportunidade ne'e traballadór sira mak aproveita.

Bainhira atu aproveita oportunidade sira ne'e, traballadór sira tenke kumpri rekejitu balun hodi asegura sira, bainhira servisu iha Kórea Súl, tanba prosesu haruka traballu sira ba servisu iha rai liur la'ós prosesu fasil, maibé liuhusi prosesu ne'ebé naruk.

Ho ida ne’e, husu ba traballadór ne'ebé hetan ona oportunidade atu aproveita ho didi’ak hodi bele loke dalan ba joven sira iha futuru.

Tuir númeru Traballadór sira ne’ebé atu aranka Korea ho totál na’in-59 maibé ida la konsege atu ba Korea Súl, tanba problema finanseiru entaun hela de’it na'in-58. Husi númeru ne’e iha traballadór foun na'in-53 no traballadór tuan na'in-5 mane hotu, sei destaka ba área peskas hamutuk na'in-26 no área fábrika hamutuk na'in-27.

Sekretáriu Estadu Formasaun Profisional no Empregu (SEFOPE) Alarico do Rosario hatete, atividade despedida halo ba traballadór hamutuk na'in-58 ne'ebé sei ba servisu iha nasaun Kórea Súl tuir kontratu ne’ebé iha.

“Ita konvida família sira mai atu halo akordu entre família husi traballadór sira-nian tanba sira ba servisu iha nasaun Kórea Súl sira sei lori Timor nia naran tanba ne'e tenke ho disiplina, kumpri regra no labele halai ses husi sistema”, informa nia.

Reprezentante Traballadór husi Munisípiu Ermera, rlindo Alves dos Santos hatete, nia parte sente kontente tanba liuhusi programa Governu nian mak bele ba servisu iha nasaun Kóre Súl hodi muda moris família nian no kontinua Estudu no ajuda alin sira ba eskola.

“Ha’u tuir formasaun lian Kórea iha tinan 2019 la konsege liu maibé iha tinan 2021 mak konsege liu no dadaun ne'e sei ba servisu iha área peskas nian ho durasaun tinan tolu fulan neen. Nune'e, ha’u prontu kumpri regra saida de’it mak Governu Timor-Leste no Governu Kórea Súl implementa”, dehan nia.

Ba trabaladíor sira ne’ebé sei aranka ba servisu iha Korea Súl tuir ona vasina kompleta dala tolu vasina astrazaneka dala rua no vasina Pfizer dala ida inklui teste médiku ho rezultadu normál.

Iha atividade ne'e, partisipa husi parte Governu nian mak Reprezentante Parlamentu Nasionál (PN) Komisaun D, Fundu Dezenvolvimentu Kapital Umanu (FDCH), Embaixada Kórea Súl no Ajensia Air Timor. (*)