Kompañia Manudare Fuel, Helio Francisco da Costa, hatete, folin mina atual iha Timor-Leste, ne'ebé kompaña importadór grosu internasionál, hanesan pitcah husi indonezia no ETO oferese ba kastamer sira iha timor laran tomak folin sa’e.

Nune’e, susar atu postu abastesimentu sira regula folin mina tun iha kada postu, maibé tenke hasa'e folin gazolina US$1.30 no gazoel US$1.45 centavus.

"Presu ne'ebé ETO fó mai ami, ha'u fa’an produtu Gazoel nia presu US$1.45 centavus kada litru, ba fali gazolina US$1.30 centavus, ida ne'e hanesan ami foti nia marjing lukru oituan de'it ona," dehan Helio iha kna'ar fatin vila antiga, segunda (04/04).

Antes ne’e, folin mina iha TL kada litru-ida husi importadór grosu ba postu abastesimentu la to'o US$1 dolár, makas liu sa'e to'o US$0,90 centavus, tanba ne'e presu mina iha fali postu abastesimentu sira kada litru-ida US$1.05 no US$1.08 centavus.

Maibé, konflitu mundiál mosu, nia impaktu afeita to'o Timor-Leste kauza sasan folin sa'e iha merkadu inklui mina motor no karreta.

"Mina folin sa'e, ita dehan lolos iha semana tolu antes iha loron ida atual, folin ida sa'e makas mak loron ida ne'e (husi 01 to'o 04 fulan marsu tinan-2022) horiseik liu ba no ohin ne'e," Nia dehan

Tanba ne'e, husu Governu haree asuntu folin mina ne'ebé hahú sa'e iha Timor-Leste, tanba iha tinan-5 ba kotuk Governu admite fornesedór grosu iha Timor-Leste la'os ETO ho Pitcah de'it, maibé iha mós fornesedór seluk husi nasaun Malasya, Singapure, Indonesia, China, inklui Australia ne'ebé antes ne'e importa mina mai Timor-Leste liuhusi aisote.

Hafoin Governu liuhusi Autoridade Nasionál Petroleo Minerais (ANPM) hapara importasaun mina husi aisote mai Timor-Leste, nune'e fila mina iha TL hahú aperta (sa'e makas).

"Rejistu ofisiál ne'e rua de'it, ETO ho Pitcah, entaun rua ne'e, aplika presu ba ita, hanesan iha merkadu karik, merkadu ne'e la liuhusi na'in-10, entaun merkadu ne'e na'in-2 piska matan, presu ne'e ita timor laran aplika hanesan hotu kedas," nia hatete

Husu ba Governu importadór labele de'it ETO ho Pitcah, maibé tenke fó oportunidade ba Timor-Oan ne'ebé antes ne'e importa mina mai Timor-Leste liuhusi aisote.

"Ita bele dehan 30 pursentu sira rua nia polítika difini presu, 70 pusentu tanba presu mundial," nia argumenta

Observasaun www.tempotimor.com nota folin mina dadaun iha Realestik fuel Baukau, Gazolina litru-ida US$1.28 no US$1.28 centavus, enkuantu folin antes inisiu fulan-marsu tinan-2022, Gazolina no Gazoel, kada litru-ida US$1.18 centavus. (*)