“Programa ne'ebé importante ohin ami diskuite, mak programa ida naran bolsa da mãen jerasaun foun. Atu apoiu osan ba inan no labarik sira sei ki’ik, no atu hala'o programa ne'e, inisiu Governu Austrália fornese tokon 7 Austrália nian, mas ita sura ba iha dólar Amerika nian 5 milhões”, dehan Embaixadór Austrália Bill, Bainhira hafoin sorumotu ho Primeira Ministra Interina no Ministra Solidariedade Sosiál no Inkluzaun, Armanda Berta iha Sala reuniaun (G-VPM-MSSI) kaikoli, segunda (04/04).
Dadaun ne'e tékniku sira serbisu maka’as tebes ho Ministériu Sosidariedade Sosiál no Inkluzaun (MSSI) atu haree oinsá inan sira bele asesu ba osan, hanesan oinsá sira bele ba rejistu no oinsá sira bele hetan pagamentu, ho ida ne'e Governu Austrália apoiu mós tékniku hodi apoiu ba programa ne'e.
“Programa ne'e bele lansa iha meiu tinan ida ne'e, no programa ne sei hahú iha munisípiu tolu mak Ainaro, Bobonaro no RAEOA. Mas progama ida ne'e sai hanesan pilotu ida, bainhira programa ne'e di’ak ita sei kontinua iha munisípiu sira hothotu”, esplika nia.
Primeira Ministra interina, Armanda Berta dos Santos hatete, setór sosiál hili nu'udar ezemplar ba setór sira seluk bazeia ba mekanizmu ne’ebé uza ho entidade sira mais koordenadu no estruturadu kompara ho setór seluk.
“Tanba ne'e ita hato'o apresiasaun profunda ba suporta ne'ebé durante ne'e Governu Austrália oferese mai Governu Timor-Leste. Nune'e mós agradese ba programa Bolsa da Mãe Jerasaun Foun nu'udar investimentu di’ak ba iha futuru”, hatete nia. (*)