Tempotimor (Dili)-Diretora Programa Nasionál Dezenvolvimentu Suku (PNDS), Claudinha Soares Pinto hatete, Munisípiu Manufahi dadaun Programa Uma Kbi’it La’ek (UKL) iha ona faze implementasaun ba progressu fiziku maibé Munisípiu sira seluk sei iha faze verifikasaun ba kandidatu benefisiáriu no ajustamentu ba Planu Implementasaun Orsamentu (POI).

“Dadaun ne'e, Munisípiu Manufahi, Postu Administrativu Alas mak halo ona implementasaun ba progresu fiziku ne'e hanesan faze implementasaun nian enkuantu maiória Munisípiu ida mak ne'e la’o ona, enkuantu Munisípiu seluk sei iha faze verifikasaun ba kandidatu benifisiáriu sira. Balun konklui ona ba verifikasaun no balun hahú dezenvolve ona Planu Implementasaun Orsamentu (POI) ba atividade refere”, dehan Claudinha Soares Pinto iha kna'ar fatin, Kolmera, Dili, tersa (29/03).

Lansamentu ba programa Implementasaun progresu fiziku hala'o iha Munisípiu Manufahi, Postu Administrativu Alas iha fulan-fevereiru liuba ne'ebé ninian implementasaun la'o hela iha terenu enkuantu atinje ona pursentu sanulu-resin-lima (15%).

Hanesan iha tinan 2021, implementasaun ba UKL iha área rurá ho medida 37 M2 kuartu 2 ho orsamentu 15 mil dollar, enkuantu medida 46 M2 ho kuartu 3 no medida ba kuartu 4×3 nia orsamentu 17 mil dollar. Iha ne’e diferente ho área urbana medida UKL ho medida 37 M2 kuartu 2 ho orsamentu 14 mil dollar, enkuantu medida 46 M2 ho kuartu 3 no medida ba kuartu 4×3 nia orsamentu 16 mil dollar.

“Tinan kotuk implementasaun orsamentu hanesan ba área rurál no urbana, enkuantu tinan ne'e, diferente ba implementasaun orsamentu iha área rurál boot liu kompara ho área urbana. Tinan ida ne'e, implementasaun UKL iha faze preparasaun ba dezeñu Bill Off Quantity (BOQ) uma rihun-4 ho orasamentu 71 milhões”, esplika nia. (*)