“Em prinsípiu, agora dadaun sai hanesan dezafiu mak dadus tanba ida ne'e mak atu resolve, atu nune'e distribuisaun ba oin la bele iha tan problema pendente sira, tanba ida ne'e mak agora hamutuk atu rezolve depois mak kalendariza, prosesu implementasaun ne'e”, dehan SEKOOP Elizário Ferreira ba www.tenpotimor.com iha salaun TradeInvest, besik palásiu Governu, sesta (18/03).

Tanba implementasaun iha primeiru, iha difikuldade boot mak, problema dadus pendente no dadus rekklamate barak liu, nune'e tinan ida ne'e hadi’a uluk dadus molok implementa ba segunda parte hodi labele mosu tan problema hirak ne'ebé mak hasoru.

Programa Sesta Bázika tinan kotuk nian, problema ne'ebé mak implementadór sira hasoru mak dadus benefisia husi Ministériu Solidariedade Sosiál no Inkluzaun (MSSI), no Ministériu Administrasaun Estatál la hanesan.

“Iha dadus ne'ebé mai mak la hanesan, balun mai husi MAE ho Funsaun Públiku, husi MSSI dadus kontradiz ba malu ne'e mak presiza iha konsellu diskusaun para iha dadus úniku e uniforme ba hothotu”, afirma nia.

Distribuisaun Sesta Bázika ba segunda parte Sekretária Estadu Kooperativa toma konta ba Munisípiu, Suai, Ainaro, Manufahi, Aileu, Manatuto Baukau Vikeké no Lospalos.

Implementasaun programa Sesta Bázika ba segunda parte, Sekretária Estadu Kooperativa nia parte instala ona komisaun estabelesidu ba implementasaun programa sesta bázika ba segunda parte nian. (*)