“Reuniaun ohin ne'e atu aserta liután koordenasaun no define kalendáriu ba implementasaun medida distribuisaun Sesta Bázika faze daruak ninian. Ne'e hanesan Primeiru reuniaun ofisiál MKAE ho MTKI no SEKOOP ne'ebé hanesan Ministériu Implementadór atu aprova kalendáriu. Programa Ezekusaun Sesta Bázika Faze Daruak ninian”, dehan Ministériu Kórdenasaun Assuntu Ekonómiku (MKAE), Joaquim Amaral, iha sala Konferensia TradeInvest Pizu 3, Kolmera Dili, sesta (18/03).
Sesta Báziku faze daruak la kleur tan sei halo anúnsio públiku no empreza sira ne'ebé iha interese atu partisipa bele hatama sira nia dokumentu liuhusi prosesu selesaun dokumentu mak foin bele selesionadu hodi distribui sesta bázika faze daruak no kalendáriu aprova sei la’o tuir faze sira iha implementasaun tinan 2022 nian.
Relasiona ho impaktu ne’ebé dadaun ne’e, Timor hasoru mak Parlamentu Nasionál (PN) aprova orsamentu montante millaun $80 atu fó kontinuasaun ba programa sesta bázika faze daruak iha tinan 2022 nia laran.
Ba faze daruak ne’e, sei distribui ba ema ne'ebé nia rendimentu menus husi $500 diferensa ho iha primeira faze iha situasaun emerjénsia tanba ne’e ema hothotu iha direitu atu hetan ai-hán.
Faze dahuluk programa sesta bázika ita taka ona iha loron 30 dezembru 2021, prosesu distribuisaun husi faze dahuluk United Nations Nasionál Development Programs (UNDP) hala’o ona estudu kona-ba impaktu husi distribuisaun sesta bázika iha faze dahuluk ne'ebé husi inkéritu husi númeru populasaun ne'ebé barak hakarak dejezu sesta bázika bele iha kontinuasaun.
Nune'e emprezáriu sira ne’ebé parsitisipa iha distribuisaun ba programa sesta bázika hamutuk 300.
Ba raklamante sira MKAE rekoñese iha rihun-15-resin mak sei tama iha lista reklamasaun. Maibé faze dahuluk sesta bázika taka ona iha fulan fevereiru 2022, nune'e konsidere lavale ona no sira sei hetan filafali iha faze daruak implementasaun sesta bázika. (*)
