Tanba altera dekretu lei ne'ebé apresenta husi Primeiru Ministru, Taur Matan Ruak, ba alterasaun dahuluk, ba dekretu lei nu.26/2021, loron 26 fulan-novembru, kona-ba medida exesionál no temporáriu sira ba vijilánsia sanitária nian hodi hatán ba pandemia moras COVID-19.
Ministru Presidénsia Konsellu Ministru (MPKM), Fidelis Leite Magalhaes esplika, alterasaun ba lei ne'e atu sidadaun sira laiha ona limitasaun hodi tama sai iha fronteira terrestre sira.
“Alterasaun ida ne'e ninia objetivu loloos ne'e saida?. Ho alterasaun ida ne'e, fronteira terrestre ne'e funsiona normál filafali, iha Batugade Salele, Oekussi nian sei funsiona normal”, dehan Fidelis ba jornalista sira iha Palásiu Governu, kuarta (16/03).
Husi alterasaun ne'e sei ezije ba sidadaun husi estranjeiru ne'ebé mai Timor-Leste mak aprezentasaun komprovativu vasina hafoin tanma mai iha Timor-Leste.
“Karik ema ruma atu mai husi rai li'ur husi Austrália ka nasaun ne'ebé de'it mai Timor la presiza ona teste no hela kuarentina maibé presiza de'it mak komprovativu ema ne'e vasina dalarua”, deklara nia.
Ba sidadaun ne'ebé mak mai husi rai li'ur mak iha komprovativu vasina kompletu sei livre movimentu durante hela iha Timor-Leste. (*)
