“SEFOPE liuhusi Diresaun Nasionál Empregu Exterior (DNEE) realiza seremónia asina deklarasaun ho família traballadór na’in-98, iha loron tersa (15/03) atu husik oan, la’en ba servisu ba nasaun Austrália. Traballadór sira ne'e sei aranka ba Austrália aban (16/03) ba etapa dahuluk nian”, informa Diretór Diresaun Nasionál Empregu Exterior, Filomeno Soares, iha Salaun Cannosiana, Bekora, tersa (15/03).
Ho serimónia ne’ebé halo atu oinsá parte husi Governu no família hodi assina deklarasaun atu sai hanesan komitmentu ida katak inan aman no família prontu ona husik sira-nia oan, la’en husi sira-nia le'et atu ba servisu iha ema nia rain.
Tanba ne’e, la'ós Governu mak obriga timoroan atu ba servisu, maibé Governu kria kondisaun de'it, oprotunidade ne'e traballadór sira mak aproveita.
Bainhira atu aproveita oportunidade sira ne'e, traballadór sira tenke kumpri rekejitu balun hodi asegura sira, bainhira servisu iha Aústralia. Tanba prosesu haruka traballu sira ba servisu iha rai liur la'ós prosesu fasil, maibé liuhusi prosesu ne'ebé naruk.
Ho ida ne’e, husu ba traballadór ne'ebé hetan ona oportunidade atu aproveita ho didi’ak hodi bele loke dalan ba joven sira iha fututu.
Traballadór sira ne’ebé atu aranka ba Aústralia ho totál ema na’in-92, iha feto na'in-36 no mane na'in-56, sei destaka ba Kompaña, Berry Pays ho totál ema na’in-32, feto na'in-11 no mane na'in-21, Tasmania Barries ho totál ema na’in-30 feto na'in-14 no mane na'in-16, Hilwood Berries ho totál ema na’in-10, feto na'in-4 no mane na'in-6, Koala Farm ho totál ema na’in-9, feto na'in-6 no mane na'in-3 no Top of the Crop ho totál ema na’in-11, feto na'in-1no mane na'in-10.
Maske nune’e iha mós traballadór sira ne'ebé aranka ba Aústralia iha etapa daruak (II) nian ho totál ema na’in-6, iha feto na'in-3 no mane na'in-3, sei destaka ba Kompaña Kimberley Accomodation. Traballadór sira sei aranka ba Aústralia iha sesta (18/03).
Reprezentante Traballadór, Guilhermina da Costa hatete, niaparte kontente tanba liuhusi programa Pacific Labour Scheeme ne'e bele ba servisu iha Aústralia.
“Objetivu ha’u-nian mak atu hadi’a família uma laran nian, kontinua estudu no ajuda alin sira ba eskola”, dehan nia.
Enkuantu Família Traballadór, Bonifacio Fernandes Viana hatete, husi parte família nian sente orgullu tanba oan hetan oportunidade ba servisu iha Austrália hodi hadi’a moris família nian.
“Ha’u-nia mensajen mak hanesan sira tenke kuidadu-an liliu sira-nia saúde nomós kuidadu sira-nia fiziku tanba kondiasaun ita-nia ho ema nia la hanesan. seluk mak sira labele servisu ilegál iha ema nia rai tanba se sira halo hanesan ne'e bele taka dalan ba kolega sira nomós família sira”, dehan nia. (*)