"Kanu tuluwake, raifoun, fatumara, bilibis no kanu fatumeta nian mota estraga totál kedas, akontese ne'e, foin lalais semana kotuk udan ne'e, ami hatama proposta dala hira ona mais seidauk responde," dehan Administradór Postu Vemase, Pedro da Costa Freitas ba www.tempotimor.com iha vemase, sabadu (12/03).
Kanu irrigasaun komunidade hamutuk 5 fornese bee ba natar hektar purvolta rihun ida-resin.
Tanba ne'e, hamutuk ho autoridade lokál submete proposta urjente ba diresaun servisu Ministéiru Agrikultura no Peskas (MAP) Baukau no tun direita haree ona ho matan, maibé to’o agora laiha resposta.
"Ne'e preukupasaun ida, tanba povu vemase nia vida mak agrikultura, se ida ne'e la responde tinan-ida ne'e hamlaha," nia argumenta
Dadaun iha natar hektar 50-resin mós hahú ameasa husi mota, nune’e husu MAP aselera prosesu hotu liuhusi proposta ne'ebé diriji ona.
Enkuantu, Postu Vemase iha Suku-7 hanesan, Suku Kaikua, Loilubo, Ostiku, Osso-Uala, Uaiga’e, Uatulari no Suku Vemase ne’ebé kompostu husi Aldeia 22 ho nia populasaun hamutuk rihun 14-resin. (*)
