Print this page

SEFOPE Hakarak Inklina iha Kooperativa F-PRO

Sekretáriu Estadu Formasaun Profesionál no Empregu (SEFOPE), Alarico do Rosario. Sekretáriu Estadu Formasaun Profesionál no Empregu (SEFOPE), Alarico do Rosario. Foto Suplay

Tempotimor (Dili)-Sekretáriu Estadu Formasaun Profesionál no Empregu (SEFOPE), Alarico do Rosario hatete, nia parte hakarak inklina-an sai membru di'ak iha Kooperativa Kréditu Uniaun (CU) Família Primeiru Profesionál (F-PRO) iha SEFOPE rasik.

“Hanesan mós hakarak apoiu ita-boot, nomós sai membru kooperativa ida, ha'u mós sei inklina iha laran, ne'ebé dala ida tan, hodi SEFOPE nia naran ami hato'o kedas katak, ohin ba oin ita servisu hamutuk SEFOPE hakarak sai mós membru di'ak ida ba kooperativa iha futuru atu hamutuk ho kooperativa”, dehan Alarico do Rosario iha serimónia tomada posse ba estrutura Kooperativa Família Profesionál, iha salaun SEFOPE Kaikoli, kinta (10/03).

Tanba formasaun kooperativa bázika ne'ebé mak Formadór SEKOOP hanorin iha estrutura foun iha Kooperativa Kréditu Uniaun (CU) Família Profesionál F-PRO ne'e iha ligasaun di'ak ho servisu SEFOPE nian durante ne'e.

“Ba ha'u programa ida ne'e di'ak la halimar, atu nune'e SEFOPE bele hatene saida mak kooperativa, tanba formasaun ne'ebé mak ami simu durante loron haat ne'e pas kedas ho ami-nia área, tanba SEFOPE nia papél ida mak hadi’a ema nia moris sai di'ak liután, ne'ebé hato'o parabéns ba Sekretáriu Estadu Kooperativa ne'ebé iha vontade servisu hamutuk ho SEFOPE”, afirma nia.

Alende husu ba SEKOOP atu kontinua fó formasaun ba membru no estrutura kooperativa Família Profesionál (F-PRO) kona-ba kréditu sira no oinsá atu sai membru kooperativa ida nia kriteria sira.

Sekretáriu Estadu Kooperativa (SEKOOP), Elizário Ferreira, esplika kona-ba oinsá sai membru ba kooperativa ida nomós oinsá kréditu osan iha kooperativa ida.

“Kuandu atu sai membru kooperativa ida tenke tuir uluk formasaun, nune'e mós bainhira atu kréditu osan iha kooperativa mós tenke tuir tan formasaun kona-ba oinsá atu rai osan sira”, esplika nia.

Ba kréditu ne’ebé aplika dadaun husi kooperativa sira iha Timor-Leste iha oin tolu hanesan Empresta Kurtu Prazu, Médiu Prazu, nune'e mós longu Prazu. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items