“Iha SEFOPE ami servi ba povu Timoroan laran tomak, ami la servi ba partidaria maibé ami servi ba povu no joven sira ne'ebé hakarak hetan oportunidade ba servisu iha Aústralia no Korea Súl hodi hadi’a nessesidade uma laran nian”, dehan Diretór Jéral SEFOPE, Paulo Alves, iha Salaun DNEE Bekora, tersa (08/03).

Tanba ne’e, SEFOPE servi traballadór Timoroan sira tuir kritéria ne'ebé mak husi empreza Aústralia sira fó mai Timor no la’ós tuir kritéria husi SEFOPE.

Ba traballadór sira ne'ebé ba servisu iha Aústralia no Korea Súl tanba sira liu iha selesaun dokumentu, teste fiziku, teste eskrita no teste orál ka entervista inklui teste PCR mak foin bele ba.

“Dala ida tan ha’u dehan ba imi katak SEFOPE la halo Koluzaun Korrupsaun no Nepotizmu (KKN) ka familiarizasaun”, esplika nia.

Iha prosesu selesaun nia laran, SEFOPE la koñese ema ida maibé traballadór balun teste la liu sira insulta liuhusi mídia sosiál dehan funsionáriu SEFOPE hatama família no hatama partidu nia ema.

“Iha evidénsia ruma kona-ba ami halo ida ne'e, bele lori ha’u ba tribunál karik ha’u sala mak ha’u sei tama komarka no ha’u hatete katak halo di’ak ba Timoroan sira-nia moris di'ak ami nen hakiduk”, deklara nia.

Maibé SEFOPE kontente bainhira traballadór sira ba servisu iha rai liur fila hadi’a sira nia moris. Nune'e husu ba traballadór sira atu apresia servisu sira ne'ebé durante SEFOPE halo ona ba sira. (*)