Rejista antes, 145, nune’e aumenta tán 8, DTP Baukau rejista ona uma estadu nian ne’ebé komunidade okupa hamutuk 153, iha 87 selu ona arendamentu no 66 seidauk.
Diretór DTP Munisípiu Baukau, Raimundo de Jesus, hatete, sidadaun ne'ebé hela iha rai no uma seidauk halo kontratu ho estadu, ékipa tekníku kontinua halo levantamentu dadus.
"Ita aumenta tán uma-8, iha Baukau vila uma-6 iha Postu Laga uma-2," dehan nia iha kna'ar fatin Tirilolo, kuarta (09/03).
Kontratu arendamentu ba komunidade ne'ebé hela rai estadu no reseita DTP Baukau rekolla ba kofre estadu iha fulan-janeiru to'o fevereiru tinan-2022 hamutuk US$6,421.00 husi totál uma-87.
"Sira ne'ebé hela iha rai estadu halo ona kontratu ho estadu laselu ita fó ona notifikasaun la'o nafatin," nia hatete
Nune'e, apela ba komunidade iha Munísipiu Baukau, ne'ebé okupa rai estadu no uma estadu, hakbesik ba DTP Baukau hodi regulariza.
Tanba, komunidade ne'ebé uza fasilidade estadu lakopera, DTP sei fó notifikasaun hodi hamamuk uma no rai eatadu.
"Iha Baukau barak mak hela iha rai estadu, maibé ita seidauk identifika hotu, tanba difikulta ékipamentu no transporte," nia dehan
Entertantu pesoál ne'ebé hala'o servisu iha DTP Baukau hamutuk na'in-14 no preokupasaun mak ékipamentus, tanba dadaun viaturas-ida dei’t no labele halo ona operasaun. (*)
