“Ha’u servisu iha Aústralia hahú iha Tinan 2017 to'o agora. Ha’u rekolla ona osan hamutuk 75.000 dolar Aústralia ka $50.000 dollar Amerika. No osan sira ne'e ha’u investe ona halo hadi’a familia uma laran hanesan hadi’a uma, selu alin nia eskola no uza ba negósiu inklui halo buat seluk hanesan sosa transporte no sira seluk”, dehan Traballadór Helder Diaz Ferreira iha Salaun DNEE, Bekora, tersa (08/03).

Dadaun ne'e, hetan tan oportunidade ba servisu iha Austrália, tanba servisu ho badinas no hatudu atitude ne'ebé di'ak. Nune’e mós dedika-an ba kompaña ne'ebé mak servisu ba.

Tanba ne’e kompaña sira louva no apresia servisu ne'ebé halo bainhira kontratu hotu sira kontaktu ba SEFOPE no hetan nafatin oportunidade atu servisu iha sira-nia kompaña.

Nu'udar traballadór Timoroan sente kontente no orgullu tebes tanba hein oportunidade ida ne'e kleur tebetebes no espera liuhusi oportunidade ida ne'e bele hadi’a di’ak liután moris.

“Ha’u agradese tebes liuhusi programa ida ne'e, ha’u hetan oportunidade ba servisu iha nasaun Austrália kuaze dala 5 ona”, afirma nia.

Iha oportunidade ne'e, sei ba servisu iha Kompaña ADCO iha North Territóri no sira ba ne'e servisu Season ne'ebe traballadór sei iha uluk North Territori muda ba Wester Austrália no Adelaide kontinua to'o fulan 9.

Antes ne'e, servisu ona iha fatin sira hanesan North Territori, Western Austrália no Adelaide. Iha fatin hirak ne'ebé servisu ba sempre hanoin katak atu servisu ho didi’ak, nune'e Kompaña ka ajénsia sira bele fó oportunidade ba Timoroan sira selu tanba Timor servisu di’ak. (*)