“Relasiona ho dever siviku no demokrasia iha ambitu Eleisaun Prezidensiál ba períodu 2022-2027 ne'ebé sei hala'o iha fulan-marsu 2022 iha Timor-Leste. Ho ida ne'e liuhusi kooperasaun servisu entre Ministériu Interior, SEPS liuhusi DNPKK, PNTL no Plan Internasional Timor-Leste, sei halo avizu no alerta sedu hahú ohin to’o bairua, atu prevene konflitu no asegura kampaña eleisaun prezidensiál”, dehan Diretór Jerál SEPS, Superintendente Ismael Babo, iha edifísiu MI, Vilaverde, segunda (07/03).

Ho ida ne’e, husu ba inan-aman fo atensaun ba oan sira, labele halo provokasaun no violénsia hasoru movimentu partidu politiku sira ne'ebé hala'o kampaña joven sira mantein kalma, koopera ho autoridade no líder lokál sira atu prevene konlitu no hamate ezisténsia ba posibilidade konflitu hodi labee fó impaktu ba ema ho vulnerabilidade hanesan ema ho difesiénsia, idozu, feto, liliu labarik feto sira atu hala'o sira-nia atividade loroloron.

Komunidade sira-nia papel importante iha prevensaun konflitu no rezolusaun inklui foti desizaun iha tempu antes eleisaun, durante no depois eleisaun prezidensiál, feto no labarik sente seguru no livre husi norma violénsia sira iha tempu antes, durante no depois eleisaun demokratiku.

Tanba ne’e, labele halo diskriminasaun ho asaun violénsia no psikolojia hasoru apoiantes ka partidu politiku husi kandidatu prezidente sira hotu.

Ssegundu Komadante Munisípiu Dili, Superintedente Assistente João Sancho Pirres husu, ba autóridade lokál no partidu polítiku sira atu nafatin kopera ho PNTL.

“Nafatin husu ba autóridade lokál no partidu polítiku sira atu nafatin koopera ho PNTL, hodi ita koopera malu, atu nune'e kampaña ne'ebé la'o iha Dili laran ne'e la'o ho di'ak no seguru”, dehan nia.

Jerente Influénsia Plan Internasional Timor-Leste, Laura Lopes, dezeja atividade ida ne'e susesu hodi la lori impaktu negative.

“Ami dezeja katak ita-nia atividade ne'e bele la'o ho susesu nomós lori impaktu pozitivu ba ita-nia atividade durante ne'e”, dehan nia. (*)