“Kuandu ita investe osan ita pengurus ita ezekutivu hatudu kinerja de traballu atu ema bele fiar ita, kuandu ema atu fiar CU (Kréditu Uniaun) atu maju ne'e mínimu ema balun tenke sakrifika-an, Jesus de'it sai Salvador ba ema umanidade nia fó nia an ba mate, maibé iha ne'e pengurus lakohi fó nia-an ba mate, pengurus tenke fó nia tempu, fó nia kapitál atu investe, pengurus tenke sai ezemplu”, dehan Elizário Ferreira bainhira partisipa Asembleia Jerál ba Kooperativa KUE iha Igreja Hosana Bebora, sábadu (05/03).

Tanba iha Kooperativa ida membru sira sempre haree lideransa Kooperativa sira-nia hahalok entre iha Kooperativa ne'e nia laran.

“Pengurus ne'e ezemplu, pengurus mak deve la selu, anggota sira dehan haree ba pengurus de'it la selu, ha'u selu, pengurus de'it la investe simpanan wajib, anggota sira dehan pengurus de'it la tau ha'u tau atu halo saida”, afirma nia.

Bainhira iha Kooperativa mak hamosu problema laiha vontade atu hasa'e vida Kooperativa sei difikulta dezenvolvimentu Kooperativa iha Kréditu Uniaun ida.

Alende ne'e Prezidente Federasaun Hanai Malu, João Belo husu ba membru no ezekutivu Kooperativa servisu hamutuk hodi trasa planu ne'ebé di'ak hodi investe Kooperativa ba oin.

“Kuandu Kooperativa sai di'ak depende ba membru sira nomós lideransa sira, ita bainhira trasa planu no regulamenntu ne'ebé di'ak no suporta husi ezekutivu ne'ebé bele hala'o nia serbisu ho di'ak mak Kréditu Uniaun forsa, kuandu Kréditu Uniaun forsa ha'u iha Federasaun Hanai Malu mós forsa iha Kooperativa”, afirma nia.

Tanba Federasaun Hanai Malu nu'udar Mahon ba Kooperativa Kréditu Uniaun hotu ne'ebé sei suporta Kréditu Uniaun sira iha Empresta no rai osan sira.

Prezidente Kooperativa Kréditu Uniaun Esperansa, Marcelino Monteiro hatete, Assembleia Jerál ba Kooperativa ne'e atu haree filafali kona-ba progresu no dezafiu sira ne'ebé mak durante ne'e hasoru.

“Ita hakarak atu hatene, atividade vida Kooperativa ne'ebé mak ita halo ne'e la'o to'o iha ne'ebé no nia rezultadu ne'e sai ona hanesan ne'ebé tanba ida ne'e mak ita-nia futuru tan ida ne'e mak ita preokupa”, esplika nia.

Kréditu Uniaun Esperansa durante tinan rua la halo Assembleia Jerál tanba iha pandemia Covid-19, nune'e sira deside filafali Asembleia Jerál iha tinan 2022. (*)