“Atu informa katak, oras ne'e iha Postu Administrativu Laklubar difikulta tebtebes transporte públiku no privadu sira atu movimentu”, dehan nia ba www.tempotimor.com iha Postu Administrativu Laklubar, Munisípiu Manatutu, sábadu (05/03).

Estrada ne'ebé aat hahú husi diresaun Suku Orlalan ba Laklubar ne'e ho distánsia maizomenus kilumetru 10, ne'ebé oras ne'e seidauk hadi’a.

Ba situasaun ne'e, parte Autoridade Lokál hamutuk ho Prezidente Administrasaun Munisípiu Manatutu nian hato'o ona relatóriu ba Ministériu Obras Públika (MOP) hodi halo ona levantamentu ba dadus.

“Ne'ebe atu dehan katak relatóriu ami-nia ne'e klaru haruka tiha ona, e husi Obras Públiku mós rekoñese e mai halo levantamentu sira maibé dala ruma sei iha prosesu nia laran hela”, hatete nia.

Aleinde ne'e iha mós ponte ida ne'ebé lokaliza iha Postu Administrativu Laklubar, ne'ebé mak hakdasak hela, tanba impaktu husi dezastre naturál iha loron 4 abril 2021, maibé to'o agora seidauk hadi'a.

Ho ponte ne'ebé mak tohar, kada loron transporte públiku ba Postu Administrativu Laklubar sempre hakur mota atu viajen ba Manatutu tanba laiha ponte.

Nune'e mós iha Estrada públiku diresaun entre Postu Administrativu Soibada ba Munisípiu Manatutu ho Postu Administrativu Natarbora ba Munisípiu Vikeke dadauk ameasa kotu sei difikulta movimentu transporte públiku.

Tuir observasaun www.tempotimor.com iha terenu nota katak, konstrusaun barajen (tembok penahan) ne'ebé mak konstrui atu satan estrada iha Suku Salau-Soibada ne'e nakfera ona no monu hkdasak hela, tanba afeta husi udan boot ne'ebe mak akontese iha tinan 2021.

La'ós ne'e de'it, iha mós ponte boot ne'ebe koiñesidu ho naran Lamaran, tohar no hakdasak hela, desde iha tinan 2021, maibé to'o ohin loron seidauk rekonstrui atu fasilita movimentu transporte públiku ho di'ak.

Nune'e mós ponte boot rua ne'ebé estabelese iha área Postu Administrativu Natarbora ninian, hetan hela amesa boot atu kotu hodi difikulta komunidade no transporte atu asesu. (*)