Loja na'in Gemea Aitara, Bernardo Domingos Guterres hatete, folin sasan nesesidade bázika iha merkadu Munisípiu Baukau maioria sa'e.
"Sasan agora maioria sa'e hotu, tanba mina litru-5 uluk, (Dos-ida folin) tun to'o US$15 no US$ 16, maibé agora Dos ida (folin) sa'e to'o US$30-resin, iha Dili (mina) 4,5 liter Dos-ida (folin) US$28 no 5 liter agora (folin) US$29.50, jergen ida ami fa’an maioria (folin) US$7.50, balun US$8 no foos mós (folin) sa'e, maibé oituan, tanba ami iha Baukau (folin) kona US$14, US$14,25 centavus, US$14,50 centavus," dehan Domingos iha vila nova, tersa (01/03).
Folin sasan kuaze hahú sa'e, tanba tuir empreza importadór sira iha nasionál, sasan iha fabrika folin sa'e no kontaiñer ne'ebé tama mai Timor-Leste mós folin sa'e.
Tuir nia, susar ba Governu atu kontrola, tanba sasan folin sa'e, la'os iha Timor de'it, maibé iha nasaun seluk mós sasan balun hahú folin sa'e.
Maibé, husu parte Komérsiu atu haree sasan báziku ne'ebé folin hahú sa'e, nune'e povu ki'ik sira bele sosan.
"Ita haree ita nia emprezáriu, funsionáriu sira ne'e di'ak, maibé ita nia povu sira fa’an kanku mak hodi sosa mina, foos ne'e susar, tanba rinso sabaun mós maoria folin sa'e, tanba ne'e Governu neutraliza para povu labele moris susar," nia hatete.
Nune'e, Xefe Departementu Servisu Munisipál Ministéiru Turizmu Komersiu no Industria (MTKI) Baukau, Sabino do Santos, preukupa atu halo intervensaun, maibé hein informasaun husi lider komunitáriu sira atu hato'o keixa.
"Folin sa'e, tuir ami nia dadus ne'ebé iha, foos globus anterior nia (folin) US$17, agora sa'e ba US$ 17.50 centavus, mina bimoli anterior (folin) US$8, agora sa'e ba US$ 8.50, (mina) sania, bingtan (folin) husi US$7 ba US$7.50 centavus no US$ 8 ba US$ 8.50 centavus, bazeia ba ami nia dadus ne'ebé iha sasan seluk folin sei normal hela," nia hatete
Tuir dadus ne’ebé Servisu Munisipál MTKI Baukau, rekolla iha semana ikus fulan-fevereiru tinan 2022, foos (Kilograma-30) Kg30 saka-ida ho folin US$17.50 centavus, Kg25 saka-ida ho folin US$14.50 centavus, foos Kg20 saku-ida nia folin US$12.00 no foos Kg15 saku-ida nia folin US$11.25 centavus.
Nune’e mós, folin mina bimoli litru-5 jergen-ida ho folin US$8.50 centavus, mina Bingtan litru-4,5 jergen-ida ho folin US$7.50 centavus, mina litru-2, ida nia folin husi US$3.50 centavus to'o US$4.00, mina mili litru-620, ida nia folin husi US$1.00 to'o US$1.50 centavus no mina mili litru 250, ida nia folin US$0,50.
Entertantu, kada semana ékipa servisu Munisípal MTKI Baukau, kontinua foti dadus kona-ba folin sasan nesesidade bázika nian iha merkadu Munisípiu Baukau. (*)
