Diretóra PNDS Baukau, Amelia Maria Viegas hatete, hahú verifikasaun ba família kbi'it la'ek sira, husi fulan-janeiru tinan-2022, dadaun Suku 33 konklui ona no Suku ne'ebé seidauk mak, iha Postu Baguia, Kelikai, Laga, Venilale inklui Baukau Vila.
"Nia preukupasaun primeiru forsa traballu iha tereñu ne'ebé natoon, maibé projetu mai ne'e makas, klima mós impaktu makas labele halo movimentu ba verifika kada postu no suku, impaktu husi udan, tanba ida ne'e ami seidauk remata verifikasaun," dehan Amelia Maria Viegas iha kna'ar fatin vila nova Baukau, segunda (28/02).
Totál funsionáriu destaka iha servisu PNDS Baukau hamutuk na'in-53, nune’e fahe ba Postu Administrativu ne'ebé Suku barak, tekníku na'in-3 no finansas na'in-3 mak destaka halo verifikasaun, Postu Administrativu ho Suku oituan na'in-4.
"Hanesan Postu Laga Vemase sira na'in-4 de'it, na'in-4 tenke kobre Suku-7 ho nia ékipa hotu, entaun sira tenke fahe kada ema ida tenke akompañia Suku ida, nia impaktu nafatin, tanba implementasaun iha Suku Aldeia-3 loron ida sira verifika Aldeia ida sira labele halo hotu," nia afirma
Maibé ékipa sira nafatin esforsu hodi aselera prosesu hotu, nune'e bele konklui verifikasaun iha fulan-marsu tinan-2022.
"Postu vemase kompostu Suku-7 konklui hetan ona lista finál, Postu Baguia kuaze Suku-8, Kelikai Suku-5, ami nafatin esforsu," nia infoma
Tuir planu, lansamentu primeira pedra ba UKL faze daruak sei realiza iha fulan-abril tinan-2022.
Enkuantu tinan 2022 Uma Kbi'it La'ek (UKL) ba Munisípiu Baukau totál hamutuk 553 ne’ebé kompostu husi Suku 59 ho nia orsamentu tokon US$9,779.520 (*)