"Ne'e seida'uk, tohar monu iha listrik leten, estraga hotu ne'ebé agora ne'e listrik seidauk lakan sei mate hela, seidauk normaliza," dehan Xefe Suku Hae-coni, Luis Oliveira ba www.tempotimor.com via telefone, sesta (25/02).
Iha loron 24 fulan-fevereiru tinan 2022 ékipa parte EDTL sira iha fatin akontesementu, maibé seidauk normaliza, nune'e kalan tolu ona komunidade balun uza de’it lilin.
Eletrisidade ne'ebé anin estraga ne’e, liga ba Suku Hae-coni, Osso-huna no Afaloikai, maibé balun dadaun simu fali ona ahi eletrisidade husi Postu Viziñu Uatucarabau no balun mak seidauk.
Tanba ne'e, parte EDTL,E.P prezisa halo normalizasaun hodi komunidade sira bele asesu hikas eletrisidade.
"Ami nia hakarak ne'e lalais, maibé tanba de'it bully mós rahun hotu tenke tula fali foun mai depois troka, ne'ebé karik ida ne'e mak difikulta ba sira karik," nia akresenta
Alende anin estraga eletrisidade iha Suku Hae-coni, iha parte Suku Alaua-Leten mós hetan estragus.
Nune’e, supervaizór EDTL,E.P Munisípiu Baukau, Edegar Pinto hatete, atu normaliza sei la promote loron, tanba kuaze eletrisidade iha Munisípiu Baukau laran barak hetan estragus, maibé garante sei hadi’a.
"Ami horseik atende Uailili no Venilale, tanba ami hadi'a uluk liña jerál ne'e, ami buka tempu ba fali Baguia Hae-coni ne'e, konforme planu ami nian, atividade la'os Baguia de'it, kuaze Munisípiu Baukau ne'e, hetan dezastre husi anin," nia hatete
Entertantu membru EDTL,E.P iha Munisípiu Baukau kompostu husi Postu Administrativu sira hamutuk na'in-43. (*)