"Agora la'o hela prosesu tenderizasaun, maibé ida ne'e, tender Internasionál," dehan nia iha Triloka, kinta (24/02).

Irigasaun iha Munisípiu Baukau, kompostu husi irigasaun modernu no komunidade, nune’e iha tinan 2022 Governu aprova orsamentu ba Irigasaun Galata Postu Venilale Munisípiu Baukau ne'ebé bele fornese bee ba natar sira iha Munisípiu Vekeke sorin.

"Venilale ne'e, projetu multi anúal ho 14 millões, mais ida ne'e husi fundus das infrastruturas Ministéiru fó de'it apeñas ba nia tekníku prosedimentu tender buat hotu husi CNA (komisaun nasionál aprovizionamentu) mak toma konta parte tekníku ami hanesan akompañiamentu ba prosedementu hotu," Maria informa

Enkuantu irigasaun komunitária iha Munisípiu Baukau barak, maibé problema iha sedimentasaun bainhira udan ho volume makas kauza rai monu estraga kanal irigasaun sira, nune’e Ministéiru nafatin esforsu atu normaliza.

Alende ne'e, Munisípiu Baukau iha potensiál boot tebes ba natar, tanba iha tinan 2022 sa'e to'o rihun 7 adisionál, maibé MAP rekuiñese iha tempu udan iha problema boot ho irigasaun.

"Irigasaun de servisu iha tempu sira hanesan ne'e, prezisa boot tebes, maibé ema mós limitadu iha nivél nasionál, ema na'in-8 de'it hanesan ema operadores nia asistente na'in-8 tán 16 pesoas, eskavatór 4 ou 5 de'it, entaun ho limitasaun sira ne'e, ami jere detail maneira para kobre hotu teritóriu tomak," nia hatete

Udan ne'ebé akontese irigasaun balun hetan estragus, MAP (Ministeriu Agrikultura no Peskas) husu natar na'in sira pasiensia, tanba sei normaliza hotu irigasaun husi parte Loromonu, rai klaran to'o Lorosa'e. (*)