“Kona-ba rede internet durante ne'e iha opiniaun públiku ne'ebé mak la'o katak internet ninia kualidade velosidade ne'e lentu, eh depois ho kustu ne'ebé maka’as. Mais hanesan ohin hato'o, to'o agora ha'u seidauk hetan reklamasaun ruma husi individu ka instituisaun ne'ebé mak afetadu”, dehan nia iha Parlamentu Nasionál, kinta (24/02).
Maibé ba preokupasaun ida ne'e, Ministériu Transporte no Komunikasaun rasik fó ona orientasaun ba Autoridade Nasionál Komunikasaun (ANC) atubele haree no avalia proativu ba progresu servisu kompaña Internet Service Provider (ISP) no operadór tolu hanesan Telemor, Timor-Telecom, Telkomsel atu oinsá bele halo atendimentu ne'ebé kualidade ba kliénte sira ho kustu ne'ebé razuável.
“Se la'e kustu sa'e e depois nia kualidade lentu e bainhira fó sertifikadu ha'u sei ko'alia ba sira haree asuntu ne'e”, hatete nia.
Maske Kompaña ISP nomós operadór telekomunikasaun hirak ne'e sai nu’udar parseiru Governu, maibé Governu fasilita no promove sira ho regra, atubele atende sira-nia kliénte no tenke kumpre sira-nia dever selu taxa Estadu.
Tanba ne'e, husu ba kliénte sira karik la satisfas ho atendimentu husi operadór telekomunikasaun ho kompaña ISP ne'ebé mak la di’ak no la kualidade, bele halo reklamasaun, liuhusi Gabinete Protesaun ba Konsumidór sira ne'ebé mak Ministériu Transporte no Komunikasaun lansa ona iha tinan 2021.
“Faktu ne'ebé iha, ate a data seidauk iha ema ida halo reklamasaun, siknifika dehan saida, karik iha mais sira seidauk ba”, hatete nia.
Pozisaun MTK kontinua hein, karik kliénte sira liliu instituisaun sira bainhira sente afetadu bele ba halo reklamasaun, atu nune'e autoridade Nasionál Komunikasaun bele haree kuandu operadór sira la kumpre sira-nia dever mak ANC nu’udar orgaun reguladór iha mós regra atu regula ba aktu kompaña sira, ne'ebé mak halo atendeimentu ba ninia kliénte la ho kualifikadu.
“Entaun apela ba ita hotu ne'ebé mak sai kliénte ba operadór tolu nomós ba kompaña ISP sira, ne'ebé mak ANC atribui ona sertifikadu ba sira, atende ninia kliente ho kualidade, sé kuandu la satisfas mak ne'e ninia prosesu mak ida ohin", dehan nia. (*)
