Tempotimor (Dili)- Aliansa Universitáriu Timor-Leste (AUTL) hamutuk ho Movimentu Universitariu Timor-Leste (MUTL) sujere ba governu atu hapara Serka Sanitária (SS) hodi hamosu regra rigurozu ba prevensaun Covid-19.

Aliansa no Movimentu estudante ne’ebé ejize governu, tanba serka sanitária ne’ebé aplika durante ne’e halo estudante barak sai vítima.

Tanba ne’e, halakon Serka Sánitaria hodi loke espasu ba estudante sira bele asesu ba ai-han, no osan husi Munisípiu hodi atende ba nesesidade.

Portavoz AUTL, Francisca da Silva hatete, governu kontinua de'it Estádu Emerjénsia, Serka Sánitaria halakon ona, impórtante tau regra rigorozu hodi kontrola prevensaun Covid-19.

"Husu ba Governu atu labele extende tán serka sanitária (SS), maibé mantein de'it ho estadu emerjénsia (EE), impórtante rigór iha implementasaun rápidu iha kontrolu", deklara Francisca iha Liceu-UNTL, kuarta (28/04).

Husu mós ba Ministru Ensinu Superior Siénsia no Kultura (MESS, Longuinhos dos Santos atu reativa aula prezensial, importante koopera ho reitór sira hodi kria mekanizmu aproriadu iha situasaun.

Nune'e mós, Movimentu Universitáriu Timor Leste (MUTL) ezije ba Konsellu Ministru hodi loke hikas dalan públiku husi kapitál ba Munisípiu.

"MUTL husu ba Konsellu Ministru atu foti desizaun hodi loke hikas dalan públiku ne'ebé husi kapitál ba Munisípiu atu nune'e estudante bele foti hahán no osan hodi uza ba nesesidade bázika responde ba sira nia estudu", dehan Portavoz MUTL, Mauraco Coli.

Haree ba situasaun epidemiolójia iha Timor-Leste mak, obriga Prezidente Repúblika (PR), iha loron 31 fulan-marsu 2021 dekreta estadu emerjénsia ba dala-12 no sei kontinua ba dala-13. (*)