Tempotimor (Dili) – Tan de'it laiha esklaresimentu ne'ebé di'ak husi eskola, inan-aman estudante 300 husi Eskola Sekundáriu Téknika Vokasionál (ESTV) Becora, Sesta (15/11/19) halo protesta iha eskola refere.

“Ami lamenta ho desizaun eskola nian, ne'ebé obriga estudante hatama osan ba estajiu nian $15 kada estudante. Tanba estudante sira ne'ebé atu ba estajiu hamutuk na'in 300, entaun eskola raut osan hamutuk $4500,” Feliciano Tilman afirma iha salaun ESTV Becora.

Nia dehan, la'ós to'o ne'e de'it. Parte eskola fó mós responsabilidade ba inan-aman atu haree sira nia oan durante tuir prosesu estajiu. “Durante prosesu estajiu, parte eskola la responsabiliza estudante sira ne'e,” Tilman dehan.

Tuir Tilman, kondisaun ne'e iróniku tebes ba inan-aman sira. Nia dehan, ida ne'e mak realidade hodi kumpri de'it Formasaun Contextu Traballu (FCT). Ne'ebé, eskola públiku ida nu'udar estadu nia obra, maibé inan-aman sira tenke hasoru dezafiu hodi hatama osan $15 ba sira nian oan atu bele halo prosesu estajiu. Maski responsabilidade eskola husik tomak ba inan aman mak leba.

"Ami la'ós dehan osan ne'e barak liu ou uituan. Maibé, osan sira ne'e atu halo saida la fó sai detallu mai ami. Satán estajiu ne'e iha karta akordu autorizasaun, dehan inan-aman mak responsabilidade maximu ba nia oan sira. Ha'u mós la kompriende. Prosesu estajiu ne'e, ami inan-aman mak haruka ou eskola mak haruka," dehan Tilman.

Iha fatin hanesan, Koordenador ESTV, Paulino Fernandes deklara ba inan-aman sira katak, kondisaun ne'e nu'udar obrigatoriu husi eskola.

"Regra ne'e desde uluk ona ami sempre hadi'a tuir avaliasaun ne'ebé antes ne'e fó ona. Osan sira ne'e %60 atu halo monitorizasaun, %10 ba manifestu estajiu no %30  ba administrasaun,"  Fernandes esplika.

Observasaun tempotimor.com iha salaun ESTV hatudu sentimentu lamentavel husi inan-aman sira. Sira dehan, regulamentu eskola ne'e konsidera fó todan de'it ba inan-aman. Tanba, eskola sei la preokupa ho risku saida mak estudante sei simu durante hala'o sira-nia estajiu.