Diretór Ezekutivu Konsellu Imprensa, Rigoberto Monteiro esplika, formasaun Basic Online Fact Checking ne'e, hala'o iha Munisípiu Baukau iha Institutu Marista ho totál hamutuk na’in-50, maibé iha de’ita na’in-38 mak partisipa.
Nune’e iha Manfahi Estudante husi Institutu Politekniku Betanu (IPB) totál hamutuk na’in-51, Munisípiu Ermera Estudante husi East Timor Coffee Institute (ETCI) Gleno, Munisípiu Ermera hamutuk na’in-77 mak tuir formasaun no Munisípiu Dili estudante husi UNDIL no UNPAZ hamutuk na’in-110 inklui UNTL no UNITAL ne'ebé tuir ona formasaun iha tinan 2021.
Totál membru ne'ebé mak sei atinje mak ema rihun-2 no totál provizória ba membru sira ne'ebé tuir ona formasaun hamutuk na’in-300, mai husi UNDIL, UNPAZ, UNTL, UNITAL, ETCI, IPB no Intitutu Marista.
“Ha’u fiar katak imi-sira ne'ebé tuir ona formasaun komprende ona kona-ba Basic Online Fact Checking. Karik iha fulan kotuk ba imi ne'ebé utiliza telemóvel android bele asesu informasaun falsu no desinformasaun sira”, dehan Diretór Rigoberto Monteiro, iha salaun KI, kuarta (23/02).
Ba formasaun ne’e, KI kordena ona ho Embaixada Amerika iha Timor-Leste atu estabelese Sentru Dadus Digitalizasaun sei estabelese husi Konsellu Imprensa kona-ba Sentru Dadus hodi kombate Hoax no desinformasaun sira ne'e.
“Ita mós presiza estabele rede aliansa kombate hoax entre mídia no estudante sira. Imi sira ne'ebé tuir ona formasaun ba oin ita sei kria grupu nasionál ida atu fasilita ita kona-ba saida mak ita-boot sira hetan durante ita-boot sira-nia observasaun ba notísia online iha plataforma dijital nian”, informa nia.
Tanba ne'e importante tebes ba Timor-Leste atu kombate desinformasaun iha sosiedade, ne’eb’e tama ona ba tempu kampaña disturbu ka kontra informasaun husi grupu ida ba grupu seluk.
Ba diskursu ho audiu no vídeo antigu ne'ebé edit foun filafali ne'e mak bolu Desinformasaun. Tanba ne'e, papel formandu sira-nian iha futuru hamutuk ho kansellu imprensa mak atu kombate informasaun sira hanesan ne'e.
“Objetivu ita-nia iha futuru mai mak atu kria rede kombate desinformasaun Timor-Leste ninian. Ita ne'e, sai vítima ba informasaun falsu no sai autór ba informasaun falsu”, hatete nia.
Ba sertifikadu ne'ebé fahe ba Estudante sira hanesan apresiasaun ida ba futuru Estudante sira sei tuir kompetisaun no bele fasilita Estudante sira.
Reprezentante husi Estudante Universitáriu, Luis Fernandes hatete, apresiza ho programa konsellu imprensa ninian ne'ebé fò ona formasaun kona-ba Basic Online Fact Checking ne'ebé atu sidadaun hotu servisu hamutuk hodi kombate informasaun hoax no desinformasun sira.
“Programa ida ne'e di’ak tebes nune'e ami rekomenda nafatin ba konsellu imprensa atu kontinua fó formasaun ba maluk sira seluk. Aliende Universitáriu sira bele mós ba Ensinu Sekundária no autoridade lokál sira inklui bele to'o iha áree rurál sira”, informa nia. (*)
