“Eskola ne'e mota lori no hamonu ona sorin hanesan parte Haris fatin nia, maibé husi MEJD labele halo buat ida tanba ne'e presiza parte Ministeriu Obras Públika, tanba ne'e agora ekipa Instituisaun Jestaun Ekipamentus haruka ona sira-nia ekipamentu pezadu ba terrenu”, dehan nia ba jornalista sira iha Palásiu Governu, kuarta (23/02).
Relasiona ho udan-boot ne'ebé mak akontese iha loron tersa (22/02) kalan to'o kuarta dadeer, mota hamonu no lori ona Eskola Tékniku Vokasionál Hera.
Dadaun parte MEJD seidauk bele halo desizaun ruma ba eskola ne'e, atu muda ba fatin seluk ka oinsá.
“Sim ha'u foin simu informasaun iha oras ida liubá katak, eskola refere parte Haris fatin no sala balun hahu monu ka mota lori ona, maske horisehik ha'u ba observa direita seidauk monu”, dehan nia.
Tanba ne'e, parte Ministeriu Edukasaun hein parte husi MInistériu Obras Públika nia karik bele normaliza mota refere ka la'e, karik la bele normaliza hafoin bele buka solusaun seluk, tanba eskola ne'e iha loos mota ibun, maibé agora labele foti desizaun ruma.
Adjuntu Diretór Eskola Ensinu Sekundáriu, Tékniku Vokasionál (ESTV), Ancelmo Freitas informa, eskola refere sorin monu foin oras hira liubá ne'e.
“Eskola sorin horseik tabele de'it ne'e monu hotu ona, parte Haris fatin nia ne'e, foin monu dadaun iha dadeer ne'e”, esplika nia. (*)