"Ita Timor ne'e ema tara-an hela de'it, feto no mane tara-an hela de'it tanba sira sente laiha ona esperansa, se sira laiha ona Esperansa, laiha ona valór ba sira-nia vida”, dehan Pastor Adão liuhusi nia pregasaun iha Igreja Evangélica Assembleia de Deus, Vilaverde, domingo (06/02).

Tanba ema ne'ebé tuir ona Jesus nu'udar sai ona Kristaun nia sempre hasoru problema ne'ebé mak dalaruma hanoin la to'o maibé kontinua tau esperansa ba Maromak. 

“Ita sira ne'ebé fiar ba Jesus ita nafatin iha esperansa, iha Na’in Jesus Kristu, ita labele lakon esperansa, maske iha buat barak iha hasoru, problema oioin, susar oioin terus buat barabarak ba ita ema mustahil difísil tebetebes maibé labele haluha tau ita-nia esperansa ba na'i Maromak”, afirma nia.

Tanba na'i Maromak sempre ajuda nia oan no nia ema sira iha tempu ne'ebé ema lakon esperansa.

Tuir Bíblia iha Markus 5:21-43 ne'ebé ko'alia kona-ba ema Jairo nia oan ne'ebé mak mate maske iha nia moris hasoru problema barak maibé ikus mak Jesus halo moris fali tanba Jairo tau esperansa ba Maromak.

Iha biblia mós hakerek katak "Jesus tama ba iha uma laran. Depois Nia husu ba sira dehan, “Nusaa mak imi rungu-ranga hodi tanis lelir hanesan nee? Labarik nee la mate ida, nia toba deit.” Maibé sira hamnasa fali Nia. Jesus haruka sira hotu sai. Depois Nia bolu labarik nee nia inan-aman ho Nia eskolante nain tolu nee, para sira tama hamutuk iha labarik nee nia kuartu laran. Depois Jesus kaer labarik nee nia liman hodi dehan ba nia, “Talita kum!” Nee dehan katak, “Noi, Hau haruka o hadeer ona”. 

Dalaruma Kristaun sira halo orasaun husu tulun ba Maromak no Maromak la hatan pedidu iha tempu ne'ebé urjente maibé kontinua tau esperansa ba Na'in Jesus.

"Dalaruma ita halo orasaun Maromak la hatan tuir nia tempu Maibé labele desesperansa”, motiva nia. 

Ho moras iha mundu sempre hasoru susar oioin no dalaruma, tanba dadaun ne'e problema ne'ebé mak Jairo hasoru to'o agora Kristaun sira mós hasoru problema ne'ebé hanesan. (*)