Diretór Servisu Edukasaun Munisípiu Baukau, Augusto Ornai Ximenes, hatete, apoiu ne’e, atu kuda fini desportivu nian, nune'e ba futuru fasilita federasaun desportivu sira la prezisa halo selesaun, maibé liuhusi jogu refere bele hetan identifika jogadór.
"Ba tinan ida ne'e, Baukau hetan apoiu orsamentu US$28,500 atu finansia ba atividade desportu ne'e, maske orsamentu ne'e boot, ita ezekuta minimu mais koko para hala'o altividade ruma ne'ebé bele motiva jogadór ba futuru," dehan Augusto iha kna'ar fatin, tersa (01/02).
Modalidade desportiva ne'ebé sei realiza ba eskola nivél ensiñu sekundáriu jerál no eskola tekníku vokasionál mak, voleibol feto-mane, futebol-11 no atletismu, maibé husi modalidade altetismu sei realiza iha loron 09 fulan-fevreiru tinan-2022, tanba sei prepara estudante sira.
Enkuantu modalidade voleibol no futebol lansa ona iha loron 28 fulan-janeiru tinan 2022.
"Jogu ida ne'e la'os liga, entaun Sekretáriu Estadu liuhusi nia mata dalan ne'ebé fó mai la'os premiu mak importante, maibé oinsá hadi'a kualidade haree fini, entaun fó de'it premiu ba primeiru no segundu lugar," nia afirma
Diretór Ensiñu Sekundária Jerál Nu.01 Tirilolo Baukau, Paulo Dias Menezes, sente kontente ho planu SEJD ne'ebé apoiu fundus hodi realiza eventu desportivu iha nivél eskolar.
"Jogu sira ne'e mós ita bele hatene, estudante sira nia talentu Governu no Munisípiu bele tau atensaun ba sira bele kontinua sira nia talentu iha mundu desportu," nia informa
Entertantu, eskola ne’eb’e atu partisipa iha eventu ne’e, kompostu eskola 20 husi postu Administrativu Baukau Vila, Vemase, Laga, Venilale, Kelikai no Baguia. (*)
