Print this page

MESSK Sei Verifika Proposta Uma-Lulik no Grupu Kulturál

By January 25, 2022 255
Ministru Ensinu Superior Siénsia no Kultura (MESSK), Longuinhos dos Santos. Ministru Ensinu Superior Siénsia no Kultura (MESSK), Longuinhos dos Santos. Foto Suplay

Tempotimor (Dili)-Ministru Ensinu Superior Siénsia no Kultura (MESSK), Longuinhos dos Santos hatete, Governu sei halo verifikasaun ba proposta uma lulik no grupu kulturál husi munisípiu atubele hetan apoiu orsamentu.

"Husi komisaun ne’ebé ita estabelese, sei halo avaliasaun ba prosesu ida ne'e, depois mak sei halo prosesu ida ke atu halo apoiu ba uma lulik. Dadus sekundáriu, ita simu hotu ona, e porposta mai hotu ona, e depois mak ita halo verifikasaun bazeia ba pedidu ne'ebé mai”, dehan nia hafoin finaliza audénsia ho Primeiru Ministru (PM), Taur Matan Ruak iha Palásiu Governu, segunda (24/01).

Ba apoiu uma lulik ne'e, iha tipu tolu mak konstrusaun ba uma lulik, reabilitasaun nomós apoiu inaugurasaun.

"Tipu hirak ne'e mak ita sempre halo ba kada Munisípiu, nomós apoiu ne'e mós la'ós Governu apoiu direta mais tenke iha proposta ne’ebé mak mai husi Munisípiu rasik”, hatete nia.

Durante hala'o atividade diálogu ho Primeiru Ministru, Taur Matan Ruak, iha munisípiu 12 inklui Oekussi ne'e, parte Governu rekolla ona informasaun no preokupasaun balun, atubele apoiu uma lulik iha Munisípiu liliu Munisípiu Lautein. 

Dadauk Orsamentu ne’ebé Governu prevee ba programa ida ne'e, ho valór hamutuk rihun US$200, no rihun US$100 apoiu ba uma lulik sira no rihun US$100 ne'e ba apoiu gropu kulturál.

Maibé seidauk iha dadaus uma lulik ho grupu kultura totál hira mak atu hetan apoiu husi Governu, tanba pedidu ne'e sei tuir prosesu legal. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items