Print this page

PN ‘Bandu’ MEJD Entrega Diploma ba Estudante Bandalizmu

By January 24, 2022 1914
Prezidente Komisaun G, António Verdial. Prezidente Komisaun G, António Verdial. Foto Suplay

Tempotimor (Dili)-Parlamentu Nasionál (PN) liuhusi Komisaun G ne'ebé trata asuntu Edukasaun, Juventude, Kultura no Sidadania, bandu Ministériu Edukasaun, Juventude no Desportu (MEJD) entrega diploma ba estudante finalista sira ne’ebé hatudu asaun bandalizmu iha fatin públiku.

“Husu ba MEJD no manorin na'in sira, identifika estudante hirak ne’ebé halo sira-nia asaun bandalizmu ne'e, lalika fó sira-nia ijasa (diploma) ne'e”, dehan Prezidente Komisaun G, António Verdial, iha plenária, segunda (24/01).

Tanba haree ba kompartamentu no responsabilidade husi estudante finalista Ensinu Sekundária Jerál (ESJ) bainhira ba rona rezultadu liu, ba pinta fali sira-nia farda ho dezeñu ne’ebé mak la di’ak no la dignu ba públiku.

"Hanesan Prezidente komisaun ne’ebé trata asuntu edukasaun iha PN, ho haraik-an hatete katak, ha’u triste tebtebes, ho nune'e sujere ba Ministériu Edukasaun atu servisu hamutuk ho responsável eskolar sira, manorin na’in sira iha territóriu tomak tenke trata asuntu ne'e ho didi’ak atu nune'e ita-nia edukasaun ne'e iha dignu”, afirma nia.

Ba situasaun ne'e hakarak rekomenda ba MEJD tenke kria rezolusaun ida ba estudante finalista sira iha territóriu tomak, atu labele hatudu tan hahalok bandalizmu sira ne'e, no iha rezolusuan ne'e rasik tenke fó sansaun ne’ebé todan ba estudante sira. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items