Tanba, tuir karta sirkular, ne'ebé Ministéiru Edukasaun Juventude no Despostu (MEJD) fó sai katak, loron 22 fulan-janeiru tinan 2022 iha Baukau, simu envolope rezultadu ezame nasionál, maibé to’o agora estudante ensiñu rekorente seidauk hetan.
Reprezentante estudante ensiñu rekorente Baukau, Sancha da Costa Ximenes hatete, estudante husi ensiñu rekorente Baukau mós partisipa iha ezame nasionál hahú husi loron 13 to'o 15 fulan-dezembru tinan 2021 no kompleta mós ho ezame lokál, maibé to'o ohin loron DNER seidauk fó sai rezultadu ezame nasionál.
"Tuir kalendáriu anúnsiu rezultadu ezame nasionál monu iha loron 20 fulan-janeiru tinan 2022 bazeia ba karta sirkular, ne'ebé fó sai Ministéiru Edukasaun Juventude no Despostu (MEJD), katak iha Baukau, 22 fulan-janeiru tinan 2022 simu envolope rejultadu ezame nasionál, maibé ami estudante husi ensiñu rekorente la hetan informasaun kona-ba distribuisaun rezultadu ezame nasionál," dehan Sancha, segunda (24/01).
Tanba ne'e, husu DNER atu fó rezultadu ezame nasionál, nune'eo iha tempu badak bele ba rejistu iha eskola ensiñu sekundáriu formal sira iha teritóriu nasionál.
"Tempu rejistu simu estudante foun mós limitadu tebes, eskola balun simu estudante foun durante loron 3 de'it, maibé DNER seidauk fó rezultadu ezame mak ami rejistu tarde eskola sira la simu oinsá," nia argumenta
Bainhira, DNER la fó rezultadu to'o eskola ensiñu sekundáriu formal sira rejistu remata, katak DNER mak impede estudante husi ensiñu rekorente Baukau nia futuru.
Nune'e, Prezidente Sentru Komunitáriu Aprendizajen ba Kreativu Baukau, Hipolito Ximenes informa, fó sai rezultadu ezame nasionál tarde ba estudante sira husi ensiñu rekorente Baukau nian, la'os akontese de'it iha tinan 2022 ne'e, maibé hahú husi kedas iha tinan 2016.
"Ohin ha'u kontaktu direita ba nasionál, maibé diretór nasionál ensiñu rekorente sira la atende, nia xefe departementu kona-ba rekorente nian konsege ami ko'alia, maibé sira hatete dokumentu husi Munisípiu ba nasionál enkamiña ba Ministéiru mak tarde," nia haktuir
Tanba ne'e, kontinua ejize ba DNER hodi fasilita estudante sira nia rezultadu ezame nasionál atubele asesu iha eskola ensiñu sekundária formal iha tempu badak. (*)
