Diretór Eskola Sekundária Santo António (ESSA) Baukau, Agnelo Eduardo Jeronimo Morreira hatete, iha tinan 2021 estudante husi ESSA Baukau na'in-2 okupa iha mellor klasifikadu ba ezame nasionál primeiru lugar, enkuantu iha na'in-4 seluk tan okupa segundu lugar iha nivél nasionál.

"Ami kontinua hakas aan, mantein ami nia prestasaun ida ne'e, sé di'ak liu karaik halo di'ak liután, labele foti aan, kontinua hakas aan, ami la puas ho buat ne'ebé iha," dehan Agnelo ba media sira iha salaun enkontru edukasaun baukau, sesta (21/01).

Tanba, Mellor klasifikadu ne'ebé hetan iha nivél nasionál hanesan fatuk ida ne'ebé atu hamrik iha leten hodi haree ba future.

Nune’e, nafatin fó parabens ba estudante sira ne'ebé iha tempu difísil, maibé kontinua esforsu aan hodi hetan rejultadu di'ak iha ezame nasionál.

ESSA iha mehi atu forma foinsa'e sira sai sidadaun ne'ebé onestu no kristaun di'ak, tanba ne'e, nafatin fó oportunidade ba foinsa'e sira atu prepara aan ba futuru.

"Buat ne'ebé ami hakas aan iha ESSA mak forma sira integralmente, la'os haree ba sira nia kapasidade intelektual, maibé haree mós ba sira nia kapasidade sira seluk mós, hanesan sosial dimensaun umana iha mós dimensaun relijioza," nia hatete

Tanba ne'e, nafatin husu ba foinsa'e sira hotu atu kontinua hakas aan estuda bainhira partisipa iha ezame nasionál. (*)