Diretór Servisu Munísipal Edukasaun Baukau, Augosto Ximenes Ornai hatete, horseik loron 20 fulan-janeiru tinan 2022, Ministéiru Edukasaun Juventude no Despostu (MEJD) iha nivél nasionál anunsiu ona kona-ba rezultadu ezame nasionál, nune'e iha nivél Munisípiu konvoka reuniaun ho diretivas eskola husi ensiñu báziku terseiru siklu no ensiñu Sekundária sira atu anunsiu rezultadu estudante ba finalista sira iha (aban) loron 22 fulan-janeiru tinan-2022.
"Husi totál ne'ebé fó sai loos duni aujéntes mak nasa (la pasa), maibé totál kandidatus ne'ebé ita aprezenta ne'e pasa 100 pursentu," dehan Augusto iha kna'ar fatin, sesta (21/01).
Durante situasaun pademia covid-19 halo MEJD suspende prosesu aprendisajem iha Munisípiu Baukau inklui Munisípiu seluk, maibé la difikulta estudante sira nia direitu hodi implementa regras partisipa ezame nasionál.
"Ba Munisípiu sira ne'ebé prosesu aprendisajem la'o normal durante pandemia covid-19 sira ne'e agrupa modelu A, iha Munisípiu Baukau sira solusiona ho tipu ezame modelu B," nia afirma
Tanba ne'e, MEJD fó sai ona rejultadu ezame nasionál nian ba Munisípiu Baukau pasa ho pursentu-100, nune'e hato'o parabens ba estudante sira ne'ebé durante esforsu iha ezame nasionál maske iha situasaun difisil nia laran.
Enkuantu, totál estudante husi ensiñu báziku terseiru siklu no ensiñu Sekundária iha Munisípiu Baukau ne'ebé partisipa iha ezame nasionál tinan akademiku 2021 hamutuk na’in 5.703 no aujénte na'in 31. (*)
