Ba desizaun ne'e, meza Parlamentu Nasionál desidi liuhusi aprezentasaun projetu rezolusaun númeru 85/V(4°), ne'ebe mak konsege hetan aprovasaun husi deputadu 47 ne'ebe mak vota afavór.

“Ho nune’e rezolusaun ne’e pasa,” dehan Prezidente Parlamentu Nasionál, Aniceto Longuinhos Guterres Lopes, iha plenária Parlamentu Nasionál, tersa (18/01).

Deputada bankada CNRT, Maria Borumali Barreto hatete, kona-ba kestaun Tais, parte balun dalaruma halo ema haluha, maske hatene hela katak ne'e riku-soin Timor-Leste nian.

"Tanba ne'e, agradese ba UNESCO nomós ba organizasaun hotu ne’ebé mak iha ninia misaun atu kontinua promove Tais Timór ne’ebé konsege rejistu iha UNESCO, e sai hanesan patrimóniu kulturál no materiál koñesidu iha mundu”, dehan nia.

Deputada PLP, Maria Angelina Sarmento hatete, rezolusaun kona-ba loron nasionál tais ne'e, deputadu sira sei foti desizaun polítika ba faze ne’ebé Estadu presiza opta.

“Opta hahú kedas hosi loron nasionál ba Tais no ita mós husu ba Governu atu kria estratejia nasionál ida oinsá bele promove no valoriza tais iha produtu internu iha nível nasionál”, esplika nia. 

Ho ida ne'e, husu Governu atu halo polítika ida hodi promove tais hanesan matéria ba estudu akadémiku no sientífiku no fó formasaun soru-tais nian ba jerasaun foun sira atubele iha transferénsia koñesimentu. (*)