Xefe Suku Camea, Marcos da Costa hatete, eskola barak iha Postu Aadministrativu Kristu Rei nia kondisaun aat no seidauk halo rekonstrusaun, tanba eskola refere hari’i iha tempu Indonézia.

"Ha'u hakarak reprezenta Postu Administrativu Cristo Rei, atu hato'o hela ha'u-nia preokupasaun balun, ba sua eselénsia, ami-nia problema, hanesan ohin sua eselénsia ohin hatete ba parte edukasaun importante, maibé iha Cristo Rei ne'ebá eskola barak mak aat, liliu eskola primaria sira”, dehan Marcos iha diálogu aberta Primeiru Ministru (PM), Taur Matan Ruak ho komunidade iha Sentru Konvensaun Dili, sesta (14/01).

Alende ne'e iha tempu Inundasaun iha loron 4 fulan-Abríl tinan 2021 konsege estraga eskola barak iha Postu Administrativu, maibé seidauk hetan atensaun husi ministériu Edukasaun.

Maibé ho esperansa boot katak Orsamentu Jerál Estadu ne'ebé Governu preve ba Ministériu Edukasaun sei bele rezolve eskola sira ne’ebé at iha tinan 2022-2023.

"Ami iha esperansa katak liu husi orsamentu 2022 ne'e bele rezolve mós problema balun ne'ebé ami-nia suku sira enfrenta iha kraik”, afirma nia.

Nune'e mós Xefe Suku husi Metinaro no Fatuhada ne'ebé mós husi atu halo konstrusaun eskola sira ne'e mak dezde Indonézia nia tempu to'o agora seidauk hadi’a.

Ministru Edukasaun Juventude no Desportu (MEJD), Armindo Maia, hanta ba preokupasaun hira ne’e katak Governu tau Ona prioridade hodi responde.

"Oitavu Governu ida ne'e sei tau prioridade ba dezenvolvimentu kapitál sosiál, ne'ebé Edukasaun no tékniku profesionál tanba ne'e iha orsamentu tinan 2021 tau orsamentu hamutuk miliaun US$25 ba infraestrutura ne'ebé ohin xefe suku sira postu administradór sira bazeia ba eskola sira ne'ebé aat, moru laiha sira ne'e”, informa Ministru Armindo.

Tanba orsamentu ho montante millaun US$25 ne'e atu hari’i no hadi’a eskola sira hamutuk 203 liuhusi tranferénsia públika, ba projetu komunitáriu nune'e mós ba kapitál dezenvolvimentu eskola hamutuk 22 no fundu infraestrutura iha eskola hamutuk 4 eskola ida mak apoiu husi Governu Korea.

Nune'e Orsamentu Jerál Estadu tinan 2022 iha miliaun US$2.3 no sei hari’i no hadi’a tan eskola 20.

"Iha tinan 2022 ne'e termina ha'u espera ita bele halo eskola hamutuk 250 eskola sira”, dehan nia.

Nune'e ba Munisípu Dili sei hari’i eskola hamutuk 16 ho nia sala hamutuk 64 liuhusi tranferénsia públika projetu komunitáriu.

Eskola sira ne'ebé mak atu hari’i hanesan eskola Eskola Ensinu Sekundária Jerál Metinaru, Ensinu Báziku Filiál (EBF) Lelaus, EBF 1,2 Bebonuk, Eskola Ensinu Báziku Sentrál (EBS) 1,2,3 Bidau Akadiruhun no seluk tan ne'ebé mak planeadu ona. (*)