Prezidente Komisaun G, António Verdial de Sousa hatete, sé Governu liuhusi Ministéiru Edukasaun Juventude no Desportu (MEJD) hasai duni sirkulár hodi limita estudante sira mak ida ne'e sei hamate ema nia diretu no liberdade.

“Hanesan deputadu, ida-ne’e taka ema-nia Liberdade. Ema hakarak ba eskola iha ne’ebé maibé ita hakarak ba taka liberdade,” dehan nia iha PN, kuarta (12/01).

Maske tinan foun 2022 ne’e, MEJD hasai sirkulár ba eskola hotu iha territóriu nasionál atu entidade relevante hodi kumpre, maibé komisaun G hanoin katak presiza haree mós ba kestaun seluk, tanba ema hotu iha diretu no liberdade atu asesu ba eskola ne'ebé de'it.

Ba sirkular ne’ebé MEJD halo ne'e, la’ós dehan la konkorda la'e, presiza tau atensaun tanba estudante ne’e ba ne’ebé depende ba nia inan-aman, se inan aman mai servisu hotu iha Dili ida ne’e klaru oan labele hela mesak iha foho no tenke mai eskola iha Dili. (*)