"Sua eselénsia Primeiru Ministru (PM) konvida ami atu hasoru malu ho nia atu fó nia Kondolénsia ba ami nu'udar señór Max nia família nomós atu haforsa konfirma apoiu Estadu nian apoiu ba institutu CAMSTL iha Timór”, dehan Espoza Saudozu Max Stahl, Ingrid Bucens, hafoin hasoru malu ho Primeiru Ministru (PM), Taur Matan Ruak, iha Rezidénsia ofisiál, tersa (28/12).
Tanba apoiu nafatin ba CAMSTL agora sira komesa ona halo draf ba proposta meius legal hodi sai Institutu Públiku.
"Oinsá ida ne'e kontinua nia prosesu sira ba oin mais ami atu finaliza dettallu kona-ba ida ne'e inklui ami husi família reprezentante husi Governu nomós”, afirma nia.
Alende ne'e Espoza Saudozu Max Stahl sente emosional ba konfiansa Governu nian ne'ebé apoiu CAMS-TL ba institutu públiku.
"Ha'u sente agradese barak nomós sente emosional tanba ida ne'e Max Stahl nia esforsu atu hetan”, hatete nia.
Maske dadaun ne'e, seidauk define, maibé sira servisu hamutuk ho Governu hodi kontinua nia prosesu sira ba oin sai legalidade.
Antes ne'e Ministru Prezidensia Konsellu Ministru (MPKM), Fidelis Leite Magalhães hatete, dadaun ne'e konsellu Ministru mós diskute ona kona-ba oinsá atu apoiu CAMS-TL ba futuru nian.
"Altura ne'ebá ha'u rasik mak foti iha Konsellu Ministru (KM) hafoin diskusaun ha'u rasik telefone kedas ba señora Ingrid Bucens, hodi aprezenta pontu Governu hodi kontinua legadu liman Max Stahl ba futuru nian”, dehan nia.
CAMSTL la mate, maibé Govenu mós hakarak atu buka forma oinsá bele garante ninia sustentabilidade, entaun idagarante ninia autonomia no mós garante ninia sustentabilidade. (*)