Print this page

Kandidatu 672 ba UNTL Hahú Tuir Ezame iha Baukau

By December 20, 2021 574
Kandidatu UNTL sira tuir hela ezame iha Eskola Ensiñu Sekundária Jerál Nu.01 Tirilolo Buakau, segunda (20/12). Kandidatu UNTL sira tuir hela ezame iha Eskola Ensiñu Sekundária Jerál Nu.01 Tirilolo Buakau, segunda (20/12). Foto Tomas Freitas

Tempotimor (Baukau)-Ministéiru Ensiñu Superior Siensia no Kultura (MESK), liuhusi pontu fokal lisensiamentu no akreditasaun ensiñu superior Timor-Leste hahú fó ezame ba kandidatu Univesidade Nasionál Timor Lorosa'e (UNTL) no Instituisaun Politekniku Betanu (IPB) hamutuk na'in-672 iha Munisípiu Baukau.

Pontu fokal, Zito de Jesus Soares hatete, kandidatu ne'ebé tuir ezame atu asesu iha UNTL no IPB kompostu husi tipu-3, filho veteranu, família kbi'it la'ek no sub-rejime oportunidade rejistu husi eskola siensia teknologia, seinsia sosiais umanidade inklui siensia tekniku vokasionál sira iha Munisípiu Baukau.

"Ohin loron ita halo kontinuasaun ba prosesu ne'ebé mak rejistu ona, ohin loron sira tama ona ba ezame asesu ensiñu supérior, tantu iha ne'e kandidatu hamutuk na'in-672, ne'e kompostu husi 474 mai husi sub-rejime oportunidade filho veteranu hamutuk 130, 68 ne'e família kbi'it la'ek nian", dehan zito, segunda (20/12).

Husi ezame ne'e mós la haree ba valór minimu no masimu husi ezame ne'e, maibé haree ba área ne'ebé kandidatu sira hili bainhira hetan valór boot mak sei asesu iha UNTL no IPB.

Loron 20 Fulan-Dezembru tinan 2021 kandidatu ne'ebé tuir ezame husi siensia teknolojia, loron 21 (aban) kandidatu siensia sosiais, enkuantu loron 22 (bainrua) kandidatu tekniku vokasionál mak sei ezame ikus.

"Ezame ne'ebé mak ohin loron ita realiza rejultadu sei hein fali ba iha rejime jerál ne'ebé mak finalista foin lalais hala'o ezame ne'e, sira nia valór ezame nasionál sai tiha ona mak halo fali kontinuasaun ba sira ne'ebé ezame agora ho sira tuir ezame nasionál rejultadu sai dala-ida", zito hateten

Enkuantu fillo veteranus no família kbi'it la'ek atu asesu iha UNTL no IPB laiha limitasaun tinan remata ensiñu sekundária.

Maibé, estudante ne'ebé finalista iha tinan 2017 to'o 2020 mak la'os veteranu oan, sei tama kategria sub-rejime oportunidade sei aplika nota minimu ba sira, atu asesu iha UNTL no IPB

 

Tanba ne'e, diploma Ministéirial rasik hakerek ona rejistu simu estudante foun ne'e hala'o bazeia ba diploma Ministérial Nu.58/2021 loron 16 fulan-Augusto konaba atu asesu ensiñu superior públiku.

"Ita fiar laiha ona problema, tanba prosesu tomak ita hatur ona ezekuta tuir ona diploma Ministérial hatur ba iha asesu ensiñu superior nian", nia hateten

Alende ne'e, estudante finalista ensiñu Sekundária iha tinan-2021 atu asesu iha UNTL no IPB, la haree mós ba valór minimu no masimu husi ezame ne'e, maibé haree ba área ne'ebé kandidatu sira hili bainhira hetan valór boot mak sei asesu iha UNTL no IPB.

Tuir planu, iha tinan 2022 kandidatu ne'ebé atu asesu iha Univesidade Nasionál Timor Lorosa'e (UNTL) no Instituisaun Politekniku Betanu (IPB) hamutuk Rihu 4-resin. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items