Print this page

Ingrid Bucens: Esperansa Max Stahl Estadu Legaliza CAMSTL

Espoza Max Stahl, Ingrid Bucens ho nia oan feto Malin presta hela omenajen ikus ba Saudozu Max Stahl iha SantaCruz, sesta (17/12). Espoza Max Stahl, Ingrid Bucens ho nia oan feto Malin presta hela omenajen ikus ba Saudozu Max Stahl iha SantaCruz, sesta (17/12). Foto Suplay

Tempotimor (Dili)-Reprezentante Família, Ingrid Bucens nu’udar spoza Max Stahl hatete, Saudozu Max Stahl esperansa boot bainhira rona promesa Estadu nia atu legaliza CAMSTL sai legadu Max Stahl.

Iha momentu Max Stahl sofre moras kankru no ba halo tratamentu Iha Nasaun Austrália, iha servisu hela de’it ba ninia arkivu ne’ebé nia hadomi tebes, halo beibeik kontaktu ho ekipa CAMSTL iha Dili, determinadu tebes atu halo buat hothotu hodi haburas no kaer metin ba beibeik CAMSTL, arkivu ne’e mak prezente Max nian ba Povu Timor-Leste.

Iha ospitál Austrália, iha loron balun molok Max husik mundu, nia simu whatsapp vídeo, mensájen no karta husi líder sira inklui Prezidente Repúblika Timor-Leste, Francisco Gutterres ‘Lú Ola’, Primeiru Ministru, Taur Matan Ruak, no líder istóriku, Kay Rala Xanana Gusmão, Mari Alkatiri no José Ramos Horta, nomós husi nia belun sira.

“Ha’u fó ba nia rona rasik. Mensájen ikus liu ne’ebé ha’u fó ba nia rona, enkuantu nia sei hatene-an, haruka husi Dr Ramos Horta, ho promesa katak sei onra Max nia hakarak. Katak sei legaliza duni instituisaun CAMSTL nu’udar Max nia legadu. Max rona, hateke ba ha’u no hatudu sinál esperansa ho nia liman fuan”, haktuir Espoza Max Stahl, Ingrid Bucens, iha serimónia funerál Max Stahl iha Semitériu Satan Cruz, sesta (17/12/2021).

Max Stahl sei deskansa ho hakmatek bainhira hatene katak oras ne’e Governu Timor-Leste fó ona onra ba promesa sira no pepara ona projeto lei atu simu Max nia hakarak tomak.

Ministru Prezidénsia Konsellu Ministru (MPKM), Fidelis Leite Magalães fiar serimónia funerál Max Stahl sai hanesan momentu ida ba Líder Nasionál sira atu hamutuk únidu hodi fó onra.

"Líder Nasionál sira marka prezensa iha ne'e, momentu ida ne'e, momentu ida ba unidade nian,  ita hotu unidu iha ne'e, hodi fó onra ba Max nia memória, no ba ita hotu ninia hakarak ida atu kontinua mantein no prezerva ninia legadu sira”, dehan nia.

Tanba ne'e, Governu hakarak fó hanoin ba foinsae sira kona-ba Max nia kontribuisaun, liuhusi ninia idea no hahalok.

"Ha’u hanoin katak iha lisaun rua ne’ebé mak foinsa'e sira bele aproveita, ida importánsia husi prezerva nasaun ninia memória, no record istoriku sira”, afirma nia.

Tanba Saudozu Max hanesan ema halo gravasaun no prezerva memória nasaun nian tomak, liliu ba líder nomós ba povu tomak ninian.

Enkuantu saudozu mós hanesan ema ne’ebé reprezenta solidaridade Internasionál nian, ema Britániku ne’ebé mak poliglota ko’alia lian barak, ne'ebe mak babain nia sempre doku sapio ho Bandeira Timor-Leste, no sempre lori kamera hanesan ninia kilat, nia husik hela konfortu vida Ingleza ninian, hodi ba sinpatiza iha nasaun oioin.

"Nia mai timor hodi halo kobertura laran monu ba povu timor, no hela metin iha ne'e. Ne'e lisaun ida ne'ebé mak foinsa'e sira bsle ku'u, katak importante tebes mai ita atu sempre konsiente no akompaña nafain buat hirak ne’ebé akontese iha mundu”, hatete nia. (*)

Rate this item
(0 votes)
Last modified on Sunday, 19 December 2021 18:37
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items