Print this page

Lere: Max Stahl Hadomi Timor Liu Fali Timoroan 

By December 16, 2021 435
Xefe Estadu Maior Jenerál, Forsa Defeza Timor-Leste (F-FDTL), Tenente Jenerál Lere Anan Timur. Xefe Estadu Maior Jenerál, Forsa Defeza Timor-Leste (F-FDTL), Tenente Jenerál Lere Anan Timur. Foto Suplay

Tempotimor (Dili)-Xefe Estadu Maior Jenerál, Forsa Defeza Timor-Leste (F-FDTL), Tenente Jenerál Lere Anan Timur hatete, maske Saudozu Max Stahl ema estranjeiru maibé hadomi Timor liu fali Timoroan sira.

"Ami mai fó omenajen ikus ba ita-nia erói, maske nia ema estranjeiru hadomi Timor liu fali Timoroan balun tanba ida ne'e mak ita tenke orgullu no valoriza”, dehan Tenente Jenerál Lere hafoin presta omenajen ba Saudozu Max Stahl, iha CAMSTL Benfika, kinta (16/12).

Saudozu Max Stahl nu'udar jornalista ne'ebé mak profesionál no brani hodi fó an ba Timor-Leste nia ukun rasik-an liuhusi filmajen ba masakre Santa Cruz iha 12 Novembru 1991.

"Tanba ne'e nia bele mate, maibé nia kontribuisaun ba rai ida ne'e ita hanoin nafatin, tanba ha'u iha relasaun di'ak tebes ho nia no nia sempre iha kuriozidade atu hatene situasaun Timor-Leste nia”, dehan nia.

Aleinde ne'e, Jenerál Lere husu ba jornalista Timoroan sira atu hakat tuir ain fatin Max Stahl nia, tanba jornalista sira-nia papel no dever importánte iha prosesu demokrasia.

"Nune'e Jornalista mak fahe informasaun atu halibur ita, maibé la'ós fahe informasaun atu haketak ka hafahe”, hatete nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items