"Buat hotu ne'ebé ita moris halo, inklui ita-nia vida rasik ne'ebé ohin loron moris iha liberdade ho independénsia folin boot tebtebes, folin karun tebtebes, mak sira hothhotu ne'ebé nia ruin iha ne'e, nia sakrifisiu boot, mak ohin loron ita moris", dehan PR Lú Olo hafoin presta omenajen ba erói Martiré sira iha Ossuáriu suku Odomau, Postu Maliana Vila, tersa (14/12).

Tanba ne'e, ho sentimentu domin, ho sentimentu rekoñesimentu, nomós ho sentimentu valoriza maluk sira ne'e hotu nia sakrifisiu, “Ami mai ita hotu iha ne'e hodi presta omenajen ba sira hotu ne'ebé fó sira-nia vida tomak ba ita-nia rain, ba ita-nia povu ida ne'e".

Alende ne'e, Prezidente Repúblika ho nia espoza Cidália Lopes Nobre Mouzinho nomós komutiva tomak, kuda mós ai-oan iha Jardin Ossuariu Bobonaro  tuir moto ne'ebé antes ne'e, Prezidente Repúblika rasik fó sai ona ba povu tomak katak, sidadaun ida kuda ai-oan ida, ba moris di'ak sidadaun hotu iha Timor-Leste.

"Moris di'ak ba ita-nia oan no beioan sira atubele hetan ambiente ida saudável, ambiente ida di'ak, ba abanbairua nian", esplika PR. 

Prezidente Konsellu Veteranu Autoridade Munisípal Bobonaro, Jaime Romão dos Santos “Dotim” informa, restu mortais ne’ebé rejista iha Bobonaro laran tomak hamutuk 802, maioria restu mortais sira ne’e tau iha Ossoáriu Maliana, no restus mortais hamutuk 290, sei rai hela iha ossuariu Bobonaro.

"Konsellu veteranu autoridade munisípal Bobonaro identifika ona fatin atu konstroi “Jardim dos Herois” iha Postu Bobonaro, nune’e iha futuru, bainhira iha orsamentu, sei realiza planu ne’e hodi bele haloot restu mortais sira ne’ebé oras ne’e tau hela iha ossoáriu Bobonaro”, dehan nia. (*)