"Husu ba autoridade sira, populasaun sira hotu, inan feton sira, prezerva nafatin no kuidadu nafatin, fatin ida ne'e ho kooperasaun Austrália nian, mai hadi’a fatin ida ne'e, prezerva nafatin hanesan istória ita-nian, istória povu Timor-Leste nian, istória partikularmente povu Balibo nia", dehan Lú Olo hafoin vizita Múzeu Balibo five (5) iha Balibo, Bobonaro, tersa (14/12).

Iha vizita ba muzeu ne’ebé uluk jornalista na’in-lima ne’e uza hodi hela, Xefe Estadu, akompaña husi Espoza Cidália Lopes Nobre Mouzinho Guterres, haree rasik dokumentu istóriku sira, fotografias, sala no kuartu sira ne’ebé jornalista hirak ne’e uza hodi servisu no deskansa, to’o ikus mai hetan oho husi militar Indonézia.

“Funu hahú husi invazaun Indonézia, hahú husi fronteira ne’ebá, hodi oho jornalista na’in-lima, ne’ebé mai atu halo kobertura ba situasaun iha ita-nia rain, iha altura ida ne’eba, tinan 1975", reafirma nia.

Prezidente Repúblika, Lú Olo vizita Múzeu Balibo 5 hodi fó omenajen ba Jornalista na’in-lima, husi Austrália: Greg Shackleton no Tony Stewart; Nova Zelándia: Gary Cunningham no husi Reinu Unidu: Brian Peters no Malcolm Rennie, ne’ebé hetan oho iha operasaun ofensiva militár Indonézia iha Postu Balibo, 16 outubru 1975.

Iha fatin hanesan, Administradór Postu Balibo, Rosário Gonçalves haktuir, uma ida ne’e, uluk ema Xina nian, maibé depois 1975, funu moris iha Timor, bapa sira (militár Indonézia) tama mai, jornalista na’in-lima mai iha ne’e.

Jornalista sira ba halo kobertura iha benten (kastelu), filafali, sira subar iha kuartu ida, bapa sira mai, kaer sira, foti, baku no oho iha ne’e.

"Uma ne’e hetan fali konstrusaun di’ak iha tempu ukun-an 2003-2004. Ita servisu hamutuk ho parseiru husi Austrália, Jornalista na’in-lima ne’e sira-nia kolega no família sira hotu mak tau hamutuk osan e depois sosa uma ida ne’e ho nia folin US$55.000. Depois konstrusaun, uma ne’e foufoun naran 'Balibo Flag Hause' depois ita hanaran “Uma Balibo Five”", esplika mia.

Tuir Kolaboradór iha muzeun Balibo Five, Mario Octaviano Soares informa, The Balibo Hause Trust mós loke klínika nehan, otél (Balibo Fort Hotel) no realiza atividade hanesan gia turíztika (tour guide), kursu inglés, suku, tein no kursu ospitalidade.

"The Balibo Hause Trust iha kontratu aluga “Puzada Balibo” ne’ebé transforma ona ba Balibo Fort Hotel no edifísiu istóriku seluk iha fatin ne’e, durante tinan-30. Projetu ne’e servisu hamutuk ho Governu Vitória desde 2002 hodi prezerva istória no orijinalidade arkeolojia", haktuir nia.

Entretantu ema ne’ebé jere muzeu Balibo Five iha ema na’in-3, klínika ema na’in-rua no hanesan gia ba turista sira, iha ema hamutuk na’in-10. (*)