Prezidennte Komisaun Organizadora Simu Sinzas Max Stahl, Silveiro Pinto Batista hatete, líder Nasionál Xanana Gusmão, no José Manuel Ramos Horta mak sei simu Saudozu Max Stahl nia sinzas tanba bazeia ba servisu ne'ebé mak durante ne'e hala'o iha tinan 1991.

"Ne'e depois ami enkontru reprezentante ne'ebé mak hola parte iha komisaun Organizadora, sira husu para líder Nasionál na’in-rua hanesan maun Boot Xanana Gusmão nomós maun Boot José Ramos Horta, razaun sira husu maun boot na’in-rua ne'e tanba Liga ho saudozu nia serbisu iha momentu ne'ebá iha 12 Novembru tinan 1991”, dehan Silveiro Pinto Batista ba Jornalista liuhusi Konferénsia imprensa ihs Sentru Audividual Max Stahl (CAMSTL), segunda (13/12).

Tanba, iha momentu 12 Novembru tinan 1991, Komandu da Luta Xanana Gusmão orienta Max Stahl atu halo kobertura ba demondtrasaun, ne'ebé mak juventude sira hala'o hasoru forsa Indonézia sira iha Santa Cruz.

"Sira informasaun ba nia (Saudozu) nia deskola husi ne'ebá mai iha dia 11 novembru 1991 kalan depois iha dia 12 ne'e nia hala'o nia misaun ne'e hanensan jornalista hodi halo kobertura ba akontesimentu ne'e, tanba ida ne'e komisaun halo ona karta ba Xanana Gusmão ne'ebé fó sai ona iha semana kotuk”,

afirma nia.

Alende ne'e objetivu komisaun Organizadora konvida líder Nasionál, José Manuel Ramos Horta tanba konsege simu filme husi Max Stahl sai instrumentu hodi halo demondtrasaun iha li'ur hodi husu apoiu ba internasionál ba Timor nia independénsia.

"Segundu mak maun boot José Ramos Horta iha momentu ne'ebá kaer pasta hanesan diplomatiku, tanba tuir komisaun Organizadora no Komité 12 Novembru deside tanba, rezultadu husi nia servisu kobertura hanesan jornalista halo filme ne'ebé haruka ba li'ur ne'e mak uza filme hanesan instrumentu ida ne'e mak hahu halo kampaña ba iha li'ur atu hetan ajuda ka suporta mai husi nasaun sira seluk”, dehan nia.

Alende ne'e Prezidente Komité 12 Novembru, Gregório Salndanha hatete, nia haku'ak hotu líder hothotu ne'ebé iha rai laran, maibé propoin líder sira ne’ebé iha ligasaun istória.

"Ami mak propoin, ami haree katak ligasaun Istóriku ne'e, importante marka prezensa labele de'it ita sira ne'e mak ba marka prezensa, ita-nia líder sira tanba uluk sira kontaktu direitu ho ita-nia as’uain Max Stahl, purtantu ultimumentu haloot nian iha fatin, di'ak ita-nia maun boot tenke marka prezensa, ne'e hatudu ba ema katak ita hadomi no respeitu no fó onra ba ema ne'e hanesan ita-nia maluk erói sira, la hatun la hasae iha nia eróis sira, ita-nia erói sira hanesan hotu”, dehan Gregório.

Maibé mós fó oportunidade ba erói sira ne'ebé mak sei moris hodi marka prezensa iha momentu ikus ba Saudozu Max Stahl nia sinza ne'ebé mak sei to'o iha loron 15 fulan ida ne'e.

Tuir oráriu ne'ebé mak Komisaun sira prepara Saudozu nia sinza ne'e sei haloot iha Semitériu Santa Cruz iha loron 17 fulan ida ne'e.

Orsamentu ne'ebé gasta ne'e apoiu husi Governu liuhusi Ministériu Assuntu Kombatete Libertasaun Nasionál (MACLN) ho montante millaun 80.737. 56. (*)