Print this page

PN Deside Subsídiu US$1 ba Estudante EBC no Sekundáriu

By December 09, 2021 1687
Deputadu sira aprova hela orsamentu iha plenaria Parlamentu Nasional. Deputadu sira aprova hela orsamentu iha plenaria Parlamentu Nasional. Foto Suplay

Tempotimor (Dili)-Parlamentu Nasionál (PN) deside hodi aprova proposta adisionál númeru 39, kona-ba apoiu subsídiu dolár ida (US$1) ba estudante sira iha Eskola Báziku Sentrál (EBC) no Sekundáriu sira iha territóriu Timor-Leste, durante fulan sanulu-resin-ida (11).

Propósta kona-ba subsídiu ba estudante sira-nian, hato'o husi deputadu proponente Kmanek Haburas Unidade Nasional Timoroan (KHUNTO), António Verdial, iha debate epesialidade OJE 2022.

Ministru Edukasaun Juventude no Desportu (MEJD), Armindo Maia hatete, apresia ba proposta 39 husi proponente, tanba konsesaun eskolár sira ne'e, tuir manual konsesaun eskolár ne'ebé aprova iha 2017, agora sei vigóra, atu fó konsesaun eskolár, subsídiu ba estudante ensinu báziku ho sekundáriu, durante fulan 11.

"Orsamentu ne'ebé mak iha, ita haree katak, prevee de'it orsamentu balu ba fulan 8, balu fulan 9. Tanba ne'e mak ami konkorda ho ida ne'e, osan la'ós barak, dolár ida ($1.00), pur estudante, pur més”, dehan nia iha Parlamentu Nasionál, kinta (09/12).

Ho maneira ida ne'ebé mak osan ida ki’ik, Governu espera tinan 2022, laiha pandemia, ne'ebé eskola sei funsiona normalmente, sei laiha suspensaun ba prosesu aprendizajen hanesan foin dadauk ne'e.

"Entaun, ho ida ne'e mak ami aseita, ami hanoin, ida ne'e direitu ita-nia estudante sira nian", relata nia.

Prezidente Parlamentu Nasional (PPN), Aniceto Guterres informa, kona-ba proposta adisionál husi bankada KHUNTO ne'e, tanba proposta iha Orsamentu Jerál Estadu (OJE) 2022 ne'e la sufisiente ba atividade sira hanesan atu fó bolsa ensinu primáriu sira no konsesaun eskolár ba eskola sekundária jerál sira.

"Ho efeitu husi proposta ida ne'e mak, atividade sei sai importante, tanba permite hodi bele sosa materiál no elementu sira didátiku nian, nune'e bele iha funsionamentu ba tinan letivu sira", dehan Aniceto. 

Entretantu proposta 39 kona-ba subsídiu ba estudante sira pasa ho rezultadu ba votasaun, afavor 37, kontra 0, no abstensaun 27. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items