Print this page

Taur Apresia ho Estabelesimentu Universidade Católica Timorense

By December 08, 2021 1240
Primeiru Ministru (PM), Taur Matan Ruak, asina hela plaka Universidade Católica Timorense São João Paulo II, iha Balide, kuarta (08/12). Primeiru Ministru (PM), Taur Matan Ruak, asina hela plaka Universidade Católica Timorense São João Paulo II, iha Balide, kuarta (08/12). Foto Tempo Timor

Tempotimor (Dili)-Primeiru Ministru (PM), Taur Matan Ruak, apresia ho estabelesimentu Universidade Católica Timorense (UCT) São João Paulo II, tanba estabelesimentu ne'e bele dezenvolve vokasaun boot Igreja Katólika nia iha Timor-Leste.

"Estabelesimentu ensinu superiór ida ne’e, bele dezenvolve vokasaun boot Igreja Katólika nian iha Timor-Leste, enkuantu servisu ba komunidade ekleziál no umana, la’ós de’it iha formasaun integrál ba joven no adultu sira, iha koñesimentu tékniku no sientífiku sira, maibé mós iha valór no méritu síviku sira, umanista no morál sira, ne’ebé sei promove formasaun ba sidadaun fiar-na’in sira, família no komunidade sira ne’ebé tolerante, ekuitativa, inkluziva, demokrátika no pasífika liután”, deklara PM Taur bainhira halo abertura ba UCT São João Paulo II iha Balide, kuarta (08/12)

Nune’e, fó parabéns ba membru hotu Komisaun Instaladora no sira hotu ne’ebé kontribui ba realizasaun ideia ne’e, hanesan mós funsionáriu hotu, peritu, tékniku, espesialista, profesór no voluntáriu sira, relijiozu no leigu sira ne’ebé kontribui direta ka indiretamente, fó sira-nia kolaborasaun ba dezenvolvimentu estratéjia, estatutu sira no ba kumprimentu kondisaun legál no akadémika sira hotu ne’ebé posibilita lansamentu ba estabelesimentu ensinu superiór ida ne’ebé importante.

"Ho ida-ne’e, ami-nia ksolok ba prezensa husi Universidade Katólika, ho nia prioridade no objetivu sira aposta iha transferénsia koñesimentu ne’ebé eselente, iha investigasaun akadémika kolaborativa no interdixiplinár, iha kultura méritu, iha kriasaun kapasidade no kompeténsia, ne’ebé envolve, la’ós de’it profesór no alunu sira, maibé envolve mós organizasaun sosiál sira Igreja nian, família no autoridade sira, iha espíritu ida loloos ba komunidade edukativa Katólika”, hatete Taur.

Komunidade Edukativa ne’ebé sertamente sei sai forte no preparadu liután atu hasoru no manán, tantu dezafiu sira, nomós oportunidade foun no importante sira ba dezenvolvimentu emerjente iha país ida ne’ebé presiza liután sidadaun sira ne’ebé ativu no preparadu hodi hatán ba nesesidade sira husi operadór ekonómiku no sosiál sira.

La posivel atu implementa moris-di’ak sosiál, hadi’ak kondisaun moris, diversifika ekonomia no hasa’e produtividade ka kualidade produtu nasionál sira, sein prezensa hosi rekursu umanu ne’ebé bein preparadu. 

"Ami felisita mós estratéjia ne’ebé define ona husi UCT, ne’ebé hodi investe iha formasaun no iha preparasaun ba joven sira, hametin papél importante ne’ebé Igreja dezempeña ona no dezempeña iha Sosiedade Timorense, hahú husi tempu Luta ba Independénsia Nasionál, hodi reforsa parseria ne’ebé estabelese iha edukasaun ho Governu Timorense no konsagra ona iha Konkordata ne’ebé asina ona ho Santa Sé”, afirma nia.

Ho nune'e, agradese inisiativa husi Arkedioseze Metropolitana Dili, ne’ebé reprezenta husi Reverendíssimu, Arkebispo Dom Virgílio do Carmo da Silva, SDB, tanba konkretiza ona projetu boot ida-ne’e ba Timoroan sira iha Rai-laran. (*)

 

Rate this item
(0 votes)
Last modified on Wednesday, 08 December 2021 23:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items