“Ha’u apela ba kompatriota hothotu atu aproveita loron memória, ho dalan, individualmente ka iha koletivu, reflete dalan naruk terus nian ne’ebé ita liutiha ona. Nia bele inspira ita no fó forsa atu kontinua obra ne’ebé inísia tiha ona", dehan Lú Olo ha nia mensajen ba komemora Loron Memória, iha Palasíu Prezidensiál Bairopite, tersa (07/12).

Tanba Lorln 7 Dezembru marka inísiu husi Povu nia luta naruk nakonu ho aten-brani ba ninia independénsia no liberdade ne’ebé manán invazór Indonézia hafoin tinan-24 nia laran.

“Ita hotu preokupadu atu hari’i futuru. Atu halo ne’e nesesáriu tebes valoriza pasadu. Ita-nia dever atu hatene sakrifísiu ne’ebé hatudu husi kompatriotas mate iha funu laran, no nu’udar forma ida agradese, forma ida rekoñese saida mak sira halo tiha ona ba rai ne’e. Laho sira-nia mártiriu no sakrifísiu ita la hetan pátria ida livre no independente", afirma Lú Olo.

Ho ida ne’e, husu ba família, Eskola, Partidu Polítiku, Organizasaun Sosiedade Sivíl no Sidadaun hothotu halo esforsu atu koñese istória Timor-Leste, valoriza pasadu, foti lisaun atubele garante jerasaun tuirmai hodi hetan futuru ida di’ak liu no pás.

Tanba ne’e importante tebes ba sidadaun hotu atu hanoin hikas faktu iha pasadu no reflete kona-ba saida mak halo, ohin no aban, atu kontinua obra husi  mártires sira.

Relijiaun Kristáaun kontribui fortemente ba Timor-Leste nia identidade. Liafuan kalváriu sai familiar ho ninia siknifikadu terus.

"Iha 7 dezembru 1975, militár Indonézia lansa invazaun ho eskala boot ba ita-nia país. Marka mós inísiu ita-nia Povu nia mártiriu naruk, kalváriu nasionál", hatete nia.

Kompatriota barak mate iha loron trájiku ne’e, inklui kompatriota ho orijen Xinés, Borja da Costa, Rosa Muki Bonaparte no jornalista Australianu, Roger East.

Konstituisaun Repúblika Demokrátika Timor-Leste rekoñese no valoriza rezisténsia sekular Povu Maubere kontra dominasaun estranjeira no sira hotu nia kontribuisaun ba luta independénsia nasionál.

Parlamentu Nasionál, liuhusi Lei númeru 3/2016, 25 maiu, eleva loron 7 dezembru nu’udar Loron Memória Timor-Leste nian. (*)