Print this page

Governu Taur Hahú ‘Hamate’ Arte iha Timor-Leste

By December 02, 2021 1036
Guarda Munisípiu Dili lori sai pintura ne’ebé artista Timoroan sira pinta no rai iha Arte Moris-Komoro. Guarda Munisípiu Dili lori sai pintura ne’ebé artista Timoroan sira pinta no rai iha Arte Moris-Komoro. Foto Tempo Timor

Tempotimor (Dili)-Governu ne’ebé lidera husi Primeiru Ministru (PM), Taur Matan Ruak, hahú hamate arte iha Timor-Leste, tanba hasai joven kreativu Arte Moris husi fatin ne’ebé sira okupa durante tinan 18, iha Komoro-Dili.

Tuir despasu ne’ebé fó sai husi Ministeriu Justisa liuhusi Diresaun Nasional Terras no Propiedade (DNTP) mak iha loron 01 fulan-dezembru 2021, Autoridade Munisipál Díli, orienta Gurada Munisípiu Dili halo eviksaun ba joven sira iha Arte Moris no hasai obra artistika sira iha ne’ebé halibur hodi produz durante tinan barak.

Intensaun Governu halo eviksaun ne’e atu utiliza área ne’e hodi hari’i Edifísiu Konsellu Kombatente Libertasaun Nasional, maibé la prepara fatin dignu ba joven sira atubele kontinua sira-nia kreatividade.

Prezidente Asosiasaun Arte Moris, Ili-Watu Dana-bere hatete, maske Governu hala'o nia servisu hodi foti sasán, maibé sira nafatin la simu atu muda ba armajen tanba armajen ne'ebé mak sira hanoin la merese atu okupa, ida ne'e mak Governu fó.

"Ami di'ak liu fila ba luroon, duke armajen, ita at liu fali komarka", dehan nia iha Edifísiu Arte Moris, Komoro, kinta (02/12).

Maibé di'ak hela, rai livre no sasán haloot tiha ona, husik ba futuru mak deside atu ba ne’ebé, tanba agora asosiasaun Arte Moris fatin metin laiha no la'o tuit anin de'it.

Nune'e Prezidente Asosiasaun Arte Moris mós preokupa ho despasu administrativu ne'ebé Governu derepente haruka ba sira, tanba antes ne'e laiha despasu.

"Ha'u la espera ne'e mak despasu administrava ne'e bele haruka hatun mai ami, tanba ami esperansa hela ho prosesu instituisaun ne'ebé la'o", haktuir nia.

Enkuantu, tuir fontes (husi Terras propriedade) ne'ebé lakoi temi naran hatete, Governu fó tiha ona notifikasaun loron 30  atu hamamuk fatin, tanba iha lei ne'e mós ko'alia iha loron 15 tenke halo rekursu ba  ministru justisa, maibé rekursu ne'e arte moris laiha resposta, siknifika arte moris la aseita, tanba  ne'e mak Governu haruka sira mai tenke hamamuk fatin.

"Governu fó tan toleránsia loron 10, maibé grupu Arte Moris la halo tuir, mak agora, ikus orden despezu mak sei hamamuk fatin", esplika nia.

Tanba Estadu voluntariumente fó fatin ba Arte Moris,  nune'e depois trata kontaktu halo arendementu la'ós atu okupa de'it tanba sasán Estadu nian.

"Maibé durante Arte Moris la halo arendementu no okupa kleur, Estadu lakon osan barak, tanba ida ne'e atu aloka fali ba instituisaun konsellu veteranu atu halo dezenvolvimentu tau edifísiu konsellu veteranu”, dehan nia.

Ba sasán sira ne'ebé agora hasai husi edifísiu Arte Moris, Governu koopera ona atu hodi ba tau iha Xanana Reading Room.

Entretantu prosesu eviksaun ne'e halo iha loron kuarta (01/12) tuku 2:15 , tanba desizaun husi Governu ho Asosisaun Arte Moris la komdis, maka Governu foti desizaun hasai sira-nia sasán. (*)

Rate this item
(1 Vote)
Last modified on Thursday, 02 December 2021 16:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items